Jeke menshik mektepter daýy: 60 oryndyq mektepke 600 oqýshynyń aqshasy bólinip kelgen

ASTANA. KAZINFORM – Qarjy mınıstriniń orynbasary Erjan Birjanov Úkimet otyrysynan keıin ótken baspasóz máslıhatynda jeke menshik mektepterdi qarjylandyratyn ortalyq Oqý-aǵartý mınıstrliginen Qarjy mınıstrliginiń quzyryna berilgenin aıtty.

- Shynymen de jeke menshik mektepterdi qarjylandyrý máselesi týyndaǵan bolatyn. Óńirlerden shaǵym kóp tústi. Úkimet Oqý-aǵartý mınıstrligine qarasty bolǵan Qarjy ortalyǵyn Qarjy mınıstrligine baǵynyshty etip, jeke menshik mektepterdegi qarjy bólý protsesin tsıfrlandyrý kerek degen sheshim qabyldady.
Buǵan deıin ótinimniń bári qaǵaz nusqada jınaldy. Qarjy ortalyǵy konkýrs jarııalap, jabyq rejımde ótkizdi. Bári qaǵaz nusqada júrgen. Biz ne istedik? 12 qarashada «Orta bilim» degen jańa júıeni engizdik. Osy ınternet resýrsqa kez kelgen adam kirip, qansha ótinim túskenin, onyń nesheýimen kelisimshart bekitilip, qansha soma aýdarylǵanyn onlaın rejımde kóre alady, - dedi ol.

Vıtse-mınıstrdiń aıtýyna qaraǵanda, tsıfrlandyrý birneshe derekter bazasyn biriktirgen. Sonyń arqasynda sybaılas jemqorlyqqa jol ashyp kelgen faktorlar joıylǵan.

- Buryn bir oqýshyny birneshe mektepke tirkep jiberýge múmkin bolsa, joq oqýshyny bar dep jazý múmkin bolsa, tsıfrlandyrý mundaı táýekelderdi joıdy. Biz ótinimde kórsetilgen oqýshyny basqa derekter bazasy arqyly qandaı jeke mektepke tirkelgenin teksere alamyz. Mysaly, mekteptiń jobalyq qýaty 60 oqýshyǵa arnalǵanymen, is júzinde 600 oqýshy bekitip jibergen jaǵdaılar boldy. Osynyń saldarynan 600 oqýshyǵa aqsha bólinip kelgen. Tsıfrlandyrý qarjy únemdep, tártip ornatýǵa kómektesti, - dedi ol.

Vıtse-mınıstr bıýdjetten tıisti aqshasyn ala almaı kelgen jeke menshik mektepterge qarajat tólene bastaǵanyn aıtty.

- 15 jeltoqsandaǵy málimet boıynsha, 847 mektep tsıfrlandyrylǵan. 765 mektep kelisimshart bekitti. Onyń ishinde 693 mektep qajetti qarjyny alǵan. Mereke aldynda 46 mlrd teńge tólengen. Búgin tańerteń bul soma 48 mlrd teńge boldy. Osynyń bári atalǵan saıttan ózderińiz de kóre alasyzdar. Bul protsess biraz ýaqyt alǵanymen shyǵyn únemdep, sybaılas jemqorlyqty boldyrmaýǵa jaqsy septigin tıgizip jatyr. 2026 jyly da osy tásilmen, tsıfrlandyrylǵan júıede jumys isteımiz, - dedi Erjan Birjanov.

Aıta keteıik, búgin Úkimette 11 aıdyń áleýmettik-ekonomıkalyq damý qorytyndysy qaralyp jatyr.