Jeke menshik mektepter bir jylda 185 mlrd teńgeniń tapsyrysyn alǵan
ASTANA. KAZINFORM — Oqý-aǵartý mınıstrligindegiler Kazinform saýalyna joldaǵan jaýabynda jeke menshik mektepterge jyl saıyn qansha qarjy bólinetinin aıtty.
— Ulttyq bilim berý derekter qorynyń málimetinshe, 2024-2025 oqý jylynda elimizde 555 myńnan astam oqýshyǵa arnalǵan 853 jekemenshik orta bilim berý uıymy tirkelgen. Onda 22 myńnan astam pedagog eńbek etedi, — dep jazady mınıstrlik mamandary.
Byltyr bul mektepterge jan basyna shaqqandaǵy bilim berý tapsyrysy aıasynda 185 mlrd teńgeden astam qarajat bólingen.
— 2024 jyly 185,2 mlrd teńge kóleminde qarjy baǵyttaldy. 2025 jylǵy 1 qańtardan bastap jekemenshik orta bilim berý uıymdarynda memlekettik bilim berý tapsyrysyn ornalastyrýǵa arnalǵan respýblıkalyq bıýdjet shyǵystary jergilikti bıýdjetterge berildi, — delingen vedomstvo jaýabynda.
Eske salsaq, Úkimet otyrysynan keıin ótetin baspasóz máslıhattarynyń birinde Oqý-aǵartý mınıstri Ǵanı Beısembaev jeke menshik mektepterdiń úlesi 5 paıyzǵa deıin kemýi múmkin degen boljam aıtqan bolatyn.