Jeke menshik mektepte oqıtyn balalarǵa da áleýmettik kómek beriledi
Qazaqstanda áleýmettik osal otbasynan shyqqan, jeke menshik mektepte oqıtyn 25 myń bala áleýmettik qoldaýdan tys qalyp otyr. Bul týraly QR Oqý-aǵartý vıtse-mınıstri Edil Ospan aıtty, dep habarlaıdy Kazinform.
Búgin Májiliste Oqý-aǵartý vıtse-mınıstri «Qazaqstan Respýblıkasynyń keıbir zańnamalyq aktilerine bilim berý jáne bala quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn tanystyrdy.
Zań jobasynda menshik nysanyna qaramastan bilim berý uıymdarynda bilim alýshylardyń jekelegen sanattaryna kómek kórsetýge jalpyǵa birdeı bilim berý qory esebinen qarajat bólýge jol ashatyn norma kózdelgen.
«Búginde 7 myńnan astam memlekettik mektepte áleýmettik az qamtylǵan otbasynan shyqqan 465 myń balaǵa qor esebinen mektep formasy, aıaq kıim, ystyq tamaq, qosymsha bilim jáne jazǵy saýyqtyrýǵa joldama berý túrinde álemýettik qoldaý kórsetilip keledi. Degenmen jeke menshik mektepte oqıtyn áleýmettik osal toptan shyqqan 25 myń bala bul kómekten tys qalyp otyr. Zań jobasy arqyly jergilikti atqarýshy organdarǵa menshikke qaramastan barlyq muqtaj otbasyna áleýmettik kómek kórsetý quzireti beriledi. Elimizde jeke menshik mektepter sany artqanyn eskersek, bul normanyń áleýmettik mańyzy úlken», - dedi Edil Ospan.
Buǵan deıin Edil Ospan balalardy asyrap alatyn kásibı otbasy ınstıtýty engiziletinin aıtqan edi.
Asyrap alýshy ata-analardyń jasy 30-53 aralyǵynda bolady, balany qabyldaıtyn kásibı otbasy mártebesin alýǵa úmitker otbasylar psıhologııalyq daıarlyqtan jáne qamqorshylyq jáne qorǵanshylyq organdarda akkredıtteýden ótedi.
