Jeke menshik dinı mektepter paıda bolyp jatqany týraly málimet shyndyqqa janaspaıdy - mınıstr

ASTANA. KAZINFORM – Oqý-aǵartý mınıstri Ǵanı Beısembaev Úkimet úıindegi baspasóz máslıhatynda belgili áleýmettanýshy Talǵat Jaqııanovtyń elde jeke menshik dinı mektepter paıda bolyp jatqany týraly málimetin teriske shyǵardy.

- Prezıdent janyndaǵy Memlekettik qyzmet akademııasy Memlekettik saıasat ulttyq mektebiniń dırektory Talǵat Jaqııanov You Tube arnalardyń birine bergen suhbatynda eldegi jeke menshik mektepterdiń keıbiri dinı sıpat alyp bara jatqanyn, tipti keıbir jeke menshik balabaqshalardyń balalarǵa dinı kontent sińirip jatqanyn málim etti. Sizdiń odan habaryńyz bar ma? Aqparatty rastaısyz ba? - dep surady jýrnalıst.

Mınıstrdiń sózinshe, mundaı tendentsııaǵa zań jol bermeıdi.

- Jalpy zań boıynsha eshqandaı belgilengen standarttyń sheńberinen tys, óz betinshe zań buzýǵa múmkindik berilmegen. Sondyqtan jergilikti oryndardaǵy sapany qamtamasyz etetin departamentter únemi, jıi baqylap otyrady. Zań buzý bolǵan jaǵdaıda tıisti sharalar qabyldaıdy. Taǵy qaıtalap aıtaıyn, eger osy zańǵa baǵynbaý faktilerin qoǵam, jýrnalıster anyqtaǵan jaǵdaıda resmı málimetin berseńizder, biz tıisti shara qoldanyp, zań sheńberinde jumys istetýge barlyq múmkindikti qarastyramyz, - dedi mınıstr.

Sondaı-aq, ol áleýmettanýshynyń málimdemesin teriske shyǵardy.

- Ol kisiniń málimdemesin estidim. Biraq bizde kóp jaǵdaıda aqparatty qarap otyramyz, shyndyqqa janaspaıtyn aqparat óte kóp. Bul bizdi alańdatady. Óıtkeni kóp jaǵdaıda adamdar óziniń kózqarasyn aıta salady. Ol keıin naqty sáıkes kelmeı jatady. Ol aqparat shyndyqqa janaspaıdy. Eger shyndyqqa janassa, ol kisi naqty qaı mektepte ekeni týraly aqparat bersin. Tıisti shara qabyldaımyz, - dedi Ǵanı Beısembaev.

Resmı málimet boıynsha, jeke menshik mektepter bir jylda 185 mlrd teńgeniń tapsyrysyn alǵan.