Jeke menshiktegi stansalar bıýdjet qarajaty esebinen jóndelmeıtin bolady
Depýtattardyń málimeti boıynsha, qazirgi tańda Jambyl oblysynyń Qordaı aýdanynda elektr energııasyna tapshylyq bar. Qazir qajetti qýattyń 90%-dan astamy kórshi Qyrǵyz Respýblıkasynan alynady.
Atalǵan aýdanda ornalasqan «Korcem» Qazaqstan-Sıngapýr kásiporny tarapynan jalpy ınvestıtsııalyq kólemi 50 mlrd teńge bolatyn 300 jańa jumys ornymen qamtamasyz etetin aýqymdy tsement zaýytynyń qurylysy júrip jatyr. Atalǵan nysanǵa 35 MVt elektr energııasyna qajettilik bar.
«Qordaı aýdanynda qýaty 63 MVA 220/110/10 kV qosalqy stantsııasy men joǵary voltty áýe jelilerin salý úshin qajetti 21 mlrd teńgeni respýblıkalyq bıýdjet esebinen bólýge yqpal etýińizdi», - delingen depýtat saýalynda.
Úkimet basshysy jaýabynda jańa energetıkalyq nysandy qarjylandyrý jolyn qaıta qaraý kerektigin aıtqan. Naqtyraq aıtsaq, bıýdjettik ótinimnen «Jambyl elektr jelileri» JShS-nyń kishi stantsııalardy rekonstrýktsııalaý boıynsha jumystary alynyp tastalýy kerek.
«Jobalaý-smetalyq qujattamada «Jambyl elektr jelileri» JShS-nyń jeke menshigindegi kishi stantsııalardy rekonstrýktsııalaý jumystary kózdeletini anyqtaldy. Bul bıýdjet zańnamasynyń talaptaryna sáıkes kelmeıdi.
«Jambyl elektr jelileri» JShS-nyń kishi stantsııalardy rekonstrýktsııalaý boıynsha jumystar alynyp tastalǵanǵa deıin ony qarjylandyrý múmkin bolmaıtynyn nazarǵa ala otyryp, ákimdik memlekettik saraptama qorytyndysyn ala otyryp, jańa jobany ázirleýdi júzege asyratyn bolady.
Jańa jobany ázirleý 2020 jyly anyqtalǵan jabdyqtardyń, materıaldardyń jáne qurylys jumystaryn qymbattaýy sebebinen smetalyq qunyn qaıta qaraý qajettiligimen de baılanysty.
Osyǵan baılanysty jobany qarjylandyrý máselesin jańa jobany ázirleý jáne bekitý qorytyndylary boıynsha qaraýǵa bolady», - dep jazady Álıhan Smaıylov.
