Jeke menshiktegi 90 mln gektar jer erozııaǵa ushyraǵan

ASTANA. QazAqparat – Qazaqstanda jer paıdalanýshylardyń nemquraılyǵynan 90 mln gektar aýmaq erozııaǵa ushyrady jáne onyń 29,3 mln gektary iske jaramsyz. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Jergilikti halyqty jaıylymmen qamtamasyz etý máselesin sheshý úshin keshendi sharalar qabyldaý qajet. Qazirgi ýaqytta jer ýchaskeleriniń menshik ıeleri men jer paıdalanýshylardyń jerge nemquraılyǵynan erozııaǵa ushyraǵan jáne erozııalyq-qaýipti jerler 90 mln gektardan asady, onyń 29,3 mln gektary is júzinde erozııaǵa ushyraǵan jáne odan ári paıdalanýǵa jaramsyz», - dedi E. Qarashókeev Úkimettiń búgingi otyrysynda.

Osyǵan baılanysty, jergilikti atqarýshy jáne ýákiletti organdarmen birlesip, jerdiń odan ári tozýyn boldyrmaý, ásirese eldi mekender mańyndaǵy jem-shóp alqaptaryn jaqsartý sharalary júrgizilýde.

«Prezıdent tapsyrmasyn oryndaý maqsatynda 2022 jyldan bastap 205,4 mıllıon gektar aýyl sharýashylyǵy jeri tsıfrlandyryldy, bul respýblıkanyń 272, 5 mıllıon gektar aýmaǵynyń 75 paıyzyn qurady. Tsıfrlyq aýyl sharýashylyǵy kartasy kontýrlar, jol jelisi, gıdrografııa, ınfraqurylym obektileri týraly málimettermen tolyǵyp, halyqtyń jaıylymǵa baılanysty problemalyq máselelerin sheshý úshin jerdiń jem-shóp syıymdylyǵy týraly aqparatty qamtıdy. Bul karta 2024 jyldyń sońynda aıaqtalady jáne aýyl sharýashylyǵy jerlerin odan ári qaıta bólýge monıtorıng júrgizýge negiz bolady», - dedi Aýyl sharýashylyǵy mınıstri.

Aıta keteıik, Qazaqstannyń 15 oblysynda mal jaıý úshin 8,9 mln gektar jer jetispeıdi. Bul kóbinese jeke qosalqy sharýashylyqtarda mal sanynyń aıtarlyqtaı ósýine baılanysty.

Ótken jyly paıdalanylmaı jatqan 5,2 mln gektar jer memleketke qaıtaryldy, 2023 jyldyń sońyna deıin taǵy 5 mln gektar jerge shara qoldanylady.