Jeke menshik mektep salýda qandaı kedergiler bar
NUR-SULTAN. QazAqparat - Sońǵy úsh aıda jeke menshik mektep salý jónindegi 153 kelisimshartqa qol qoıylǵan. Bul týraly «Orta bilim salasyndaǵy memlekettik-jekeshelik áriptestik: jekemenshik mektepter» taqyrybynda ótken onlaın konferentsııada aıtyldy, dep habarlaıdy QazAqparat tilshisi.
«Jeke menshik mektep salýǵa qatysty memlekettik tapsyrys alý mehanızmine kelsek, bári sátti bolyp keledi. 2013 jyly memlekettik tapsyrys aıasynda 13 mektep qana salynsa, 2019 jyly 114 mektep salyndy. Sońǵy úsh aıdyń ózinde jeke menshik mektep salý jónindegi 153 kelisimshartqa qol qoıdyq. Bul mektepterde 104 000 bala oqıtyn bolady. Bıýdjette aqsha bar, 2021, 2022 jyldarǵa qarjy qarastyrylǵan», - deıdi «Qarjy ortalyǵy» AQ prezıdenti Asqar Ibraımov.
Ol jeke menshik mektep salýǵa qatysty birqatar másele bar ekenin aıtty.
«Pandemııaǵa baılanysty áreń ashylǵan jeke menshik mektepter jabylyp qaldy. Soǵan baılanysty bilikti mamandardy joǵaltyp alý qaýpi bar. Mektep qurylysyn júrgizý nemese qaıta jóndeý protsesteri qymbattap ketti. Zań jaǵynan da shekteýler bar. Mysaly, jeke menshik mektepter oqýlyqtarmen, sonymen qatar tegin tamaqpen qamtylmaıdy. Jalpy alǵanda, QR Bilim jáne ǵylym mınıstrligi bir orynda turyp qalǵan joq. Mysaly, jeke menshik mektepterdi qoldaý maqsatynda oqýshylar qashyqtyqtan oqyp jatqanyna qaramastan memlekettik bilim berý tapsyry boıynsha tólem toqtap qalǵan joq. Memlekettik tapsyrysty ornalastyrǵan kezde jemqorlyqqa jol berilmeıdi, barlyq baıqaý protsedýralaryn alyp tastady. Memlekettik tapsyrysty ornalastyrýdyń ózi qashyqtan júzege asyrylady», - deıdi ol.
