Jeke menshik mektep salý arqyly mekteptegi oryn tapshylyǵyn 90% sheshýge bolady

NUR-SULTAN. QazAqparat - Eger qazir jeke menshik mektep salýdy qolǵa almasaq, 2025 jyly mekteptegi oryn jetispeýshiligi 470 000-ǵa jetýi múmkin. Bul týraly «Orta bilim salasyndaǵy memlekettik-jekeshelik áriptestik: jekemenshik mektepter» taqyrybynda ótken onlaın konferentsııada aıtyldy, dep habarlaıdy QazAqparat tilshisi.

«Memlekettik mektep qalaı salynady?» degen suraqqa keletin bolsaq, bul mektep qurylysy ǵana emes ekenin túsinemiz. Memlekettik mektep salýǵa jer bólip berý, ınjenerlik kommýnıkatsııa, kúrdeli jáne aǵymdaǵy jóndeý máseleleri kiredi. Sonda mektep qurylysynyń ózine ǵana 3-6 mlrd teńge ketedi. Sonymen qatar, ony kerek-jaraqpen qamtý úshin jylyna 300 mln teńge qajet bolady. Ár toǵyz jyl saıyn aǵymdaǵy jóndeý jumystary úshin 600 mln teńge ketedi. Memlekettiń bir jeke menshik mektepke bóletin shyǵynyn salystyrsaq, bir oqýshy úshin jylyna 284 000 teńge ketedi. Bul – operatsııalyq shyǵyn. Al amortızatsııalyq shyǵyn 266 000 teńge bolady. Demek, 1200 oryndyq mektepti alatyn bolsaq, bıýdjetten 3,5-4 mlrd teńge únemdeýge bolady», - deıdi «Qarjy ortalyǵy» AQ Prezıdenti Asqar Ibraımov.

Ol memlekettik tapsyrysty jarııalaǵan kezde qarjylaı ǵana paıda bolmaıtynyn aıtty.

«Pedagogtar úshin eńbek shartynyń jaǵdaıy, bilim berý ortasynyń jaǵdaıy, sondaı-aq oqýshylarǵa oryn jetpeı qalý máselesi jaqsarady. Mysaly, Shymkent - jeke menshik mektepterdi damytý boıynsha kóshbasshy. 2019 jyly ol jaqta 22 jeke menshik mektep ashylǵan. Bul jeke menshik mektepterge memlekettik mektepterden 6764 oqýshy aýysyp barǵan. Saraptama jasaǵan kezde memlekettik mektepterdegi oqýshylarǵa 16 000 oryn jetpegen. 2020 jyly Shymkentte kem degende taǵy 11 jeke menshik mektep ashylady. Ol jaqqa 7690 oqýshy aýysyp barady. Eger bári jospar boıynsha bolsa, jeke menshik mektep salý arqyly mekteptegi oryn jetispeý máselesin 90% shesher edik. Eger osyndaı qadamdar jasamasaq, 2025 jyly mektepte oryn jetispeý kórsetkishi 470 000-ǵa jetýi múmkin», - deıdi ol.