Jeke mektepterde oqıtyn áleýmettik osal otbasylardan shyqqan balalarǵa kómek beriledi
ASTANA. KAZINFORM – Jekemenshik mektepterde oqıtyn áleýmettik osal otbasylardan shyqqan balalarǵa kómek beriledi. Bul týraly Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý jáne balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaý kezinde Oqý-aǵartý mınıstri Ǵanı Beısembaev aıtty.
«Jeke mektepterde oqıtyn áleýmettik osal otbasylardan shyqqan balalarǵa memlekettik bilim berý tapsyrysy aıasynda áleýmettik kómek kórsetý eskerilgen. Qazirgi kezde memlekettik mektepterde oqıtyn halyqtyń áleýmettik osal toptary (HÁOT) sanatyndaǵy 500 myńnan astam balaǵa jalpyǵa mindetti bilim berý sheńberinde tamaqtanýmen qamtamasyz etý jáne kıim, mektep kerek-jaraqtaryn satyp alý túrinde kómek kórsetiledi. Alaıda, jekemenshik mektepterde oqıtyn HÁOT sanatyndaǵy 25 myńnan astam bala áleýmettik kómek ala almaýda. Osyǵan oraı menshik nysanyna qaramastan HÁOT sanatyndaǵy barlyq balalarǵa teń kómek kórsetý maqsatynda jergilikti atqarýshy organdardyń quzyreti keńeıtilip jatyr», - dedi Ǵ. Beısembaev.
Sonymen qatar mınıstr Memleket basshysynyń tapsyrmasy boıynsha árbir balanyń «otbasynda ómir súrý jáne tárbıelený» quqyǵyn iske asyrý boıynsha túzetýler ázirlengenin aıtty.
«Qıyn jaǵdaıǵa tap bolǵan balalarǵa senim men jylýlyq atmosferasyn qalyptastyrý, psıho-emotsıonaldy jaǵdaıyn saqtaý, kúızelisten qorǵaý, qoǵamda tabysty áleýmettendirý maqsatynda otbasylyq ornalastyrýdyń jańa nysanyn engizý usynylady. Balany qabyldaıtyn kásibı otbasylar ınstıtýtyn engizý kezinde tıisti jańa tásilder ázirlendi. Balalar anyqtalǵannan keıin, balalalar úıine emes, birden otbasylarǵa tabystalady. Árbir bala ata-ananyń nazarymen jáne qamqorlyǵymen qamtylýy úshin bir kásibı otbasynda balalar sany 4-ten aspaıdy. Balany qabyldaıtyn kásibı otbasy mártebesin alýǵa úmitker otbasylar psıhologııalyq daıarlyqtan ótedi», - dedi vedomstvo basshysy.
Mınıstrlik málimetine qaraǵanda, qazir respýblıkada 21 myńnan astam jetim bala jáne ata-anasynyń qamqorlyǵynsyz qalǵan bala bar. Qamqorshylyq (opeka-15 668), patronat (1660), qabyldaýshy otbasy (prıemnaıa semıa- 332 bala, 65 otbasy), bala asyrap alý (ýsynovlenıe – 194) t.b. Júrgizilip jatqan saıasattyń nátıjesinde 12 jyl ishinde balalar úıinde tárbıelenip jatqandar sany 4 esege, al balalar úıiniń sany 2,5 esege azaıdy. Qazir 115 uıymda 3 727 jetim bala jáne ata-anasynyń qamqorlyǵynsyz qalǵan bala tárbıelenip jatyr.
Osyǵan deıin kópbalaly, turmysy tómen otbasylardan shyqqan 80 bala áskerı mektepti aıaqtaǵany týraly jazdyq.
