Jeke mekteptegi býllıng týraly is toqtatyldy – polıtsııa

ALMATY. KAZINFORM – Almatydaǵy jeke mektepterdiń birinde kámeletke tolmaǵan oqýshyǵa qatysty býllıng boldy degen aqparat boıynsha qozǵalǵan qylmystyq is toqtatyldy. Bul týraly Almaty Polıtsııa departamentiniń baspasóz qyzmeti habarlady.

Vedomstvo málimetinshe, is Naýryzbaı aýdandyq Polıtsııa basqarmasynda tirkelip, sotqa deıingi tergeý júrgizilgen. Alaıda tekserý barysynda atalǵan derekter rastalmaǵan, býllıng faktileri anyqtalmaǵan.

– Osyǵan baılanysty qylmystyq is qylmystyq quqyq buzýshylyq quramynyń bolmaýyna baılanysty toqtatylǵan. Qabyldanǵan sheshim prokýratýra organdarymen kelisilgen, - delingen habarlamada.

Polıtsııa departamenti azamattar men buqaralyq aqparat quraldaryn, ásirese kámeletke tolmaǵandarǵa qatysty, tekserilmegen aqparatty taratpaýǵa úndedi.

Eske salaıyq, buǵan deıin balanyń ákesi Qanat Ámirkın áleýmettik jelide oqıǵa týraly jazba jarııalaǵan. Onyń aıtýynsha, qyzy jansaqtaý bólimine túsken. Ákesi bolǵan jaıtqa jeke mekteptegi jaǵdaı sebep boldy dep esepteıdi jáne balasyna psıhologııalyq qysym kórsetilgenin aıtty.

Keıinirek Almaty qalasynyń bala quqyqtary jónindegi ýákili Dıana Erlan jeke mektepterdiń birinde oqıtyn, sýıtsıd jasaýǵa árekettenip, keıin aýrýhanaǵa jetkizilgen oqýshy qyzdyń jaǵdaıyna qatysty túsinik berdi.

Al Almatynyń Bilim basqarmasy arnaıy monıtorıng toby qurylǵanyn habarlady.