Jeke málimetter qoldy boldy: Qazaqstandyqtarǵa JSN-di aýystyrý qajet pe
ASTANA. KAZINFORM — Jeke derekterimiz ınternetke jaıylyp ketkennen keıin, kópshilikti «JSN-di aýystyrý kerek pe?» degen suraq mazalaı bastady. Buǵan Ádilet vıtse-mınıstri Bekbolat Moldabekov jaýap berdi.
Aıta keteıik, buǵan deıin jelige qazaqstandyqtar týraly 16 mıllıonǵa jýyq málimet shyǵyp ketken bolatyn.
Keıin bul jaǵdaıǵa qatysty tıisti organdar tekseriste bolatyny jaıly málimdegen.
— JSN-di qaıta shyǵarýdyń esh máni joq, óıtkeni bul — sáıkestendirý nómiri. Nesıeler men alaıaqtarǵa keletin bolsaq, biz áriptesterimizben birge arnaıy jumys istedik. Egov portalynda «Stop-kredıt» servısi bar. Sol reestrge aty-jónińizdi engizseńiz, sizdiń ruqsatyńyzsyz eshkim atyńyzǵa nesıe rásimdeı almaıdy. Sondyqtan derekterdiń bári qorǵalǵan, — dedi vıtse-mınıstr.
Onyń aıtýynsha, eń basty qaýip adamdardyń óz ańǵaldyǵynan bolady. Sondyqtan ol alaıaqtarǵa aldanbaýdyń jolyn da túsindirdi.
— Eń bastysy eshkimge senbeńizder. Telefonǵa kelgen SMS-kodtardy eshkimge aıtýǵa bolmaıdy. Ol kodtar tek memlekettik qyzmet alyp jatqanda ǵana kerek. Saqtanyp júrý úshin 1414 nómirinen kelgen habarlamany eshkimge jibermeńiz. Al nesıe almaıtyn bolsańyz, baıaǵy «Stop-kredıtti» qosyp tastaǵan durys. Eger aqsha kerek bolyp jatsa, bul shekteýdi nebary eki mınýtta alyp tastaýǵa bolady, — dedi Bekbolat Moldabekov.
Esterińizge sala keteıik, buǵan deıin Tsıfrlyq damý mınıstri Jaslan Mádıev te osy máselege qatysty óz pikirin bildirgen edi.
