Jeke kýálikti aýystyrý tolyǵymen onlaın formatqa kóshiriledi

ASTANA. KAZINFORM — Sáýirdiń sońyna deıin jeke kýálikti aýystyrý protsesi tolyǵymen onlaın formatqa kóshiriledi. Endi fotosýrettiń talaptarǵa sáıkestigin maman emes, JI-model baǵalaıdy. Osylaısha, shamamen 1 mln adam HQO-ǵa barmaı-aq, ýaqytyn únemdeıdi.

Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıevtiń aıtýynsha, ótken jyly Halyqqa qyzmet kórsetý ortalyǵynyń operatorlary 15,2 mıllıon qyzmet kórsetti. 

— Ótinishterdiń 80%-y on qyzmetke tıesili. Biz memlekettik organdarmen birlesip, bul qyzmetterdi avtomattandyrý jáne balamasyz, tek onlaın formatqa kóshirý boıynsha jol kartalaryn ázirledik. Birinshi kezeńde: jeke kýálikti aýystyrý, elektrondy tsıfrlyq qoltańba berý, eńbekshi mıgranttarǵa ruqsat berý qyzmetteri. Kelesi kezekte tirkeý qyzmetteri tur: kólik, jyljymaıtyn múlik, jer qujattary. Maqsatymyz — jyl sońyna deıin Halyqqa qyzmet kórsetý ortalyǵynyń júktemesin 50%-ǵa deıin azaıtý, — dedi Jaslan Mádıev Úkimettiń búgingi otyrysynda.

Mysaly, eń suranysqa ıe qyzmetterdiń biri — jeke kýálikti aýystyrý. Buryn azamattardyń Halyqqa qyzmet kórsetý ortalyǵyna kelýi, foto túsirýi jáne uzaq kezekte turýy qajet bolatyn.

— Aıdyń sońyna deıin bul protsess tolyǵymen onlaın formatqa kóshiriledi. Biz protsesterdi sátti synaqtan ótkizdik jáne fotosýrettiń talaptarǵa sáıkestigin mamannyń ornyna AI-model baǵalaıtyn júıeni oqyttyq. Protsess barynsha qarapaıym: ıdentıfıkatsııadan ótý, foto men qoltańbany júkteý, onlaın tólem jasap, qujat daıyn bolǵany týraly SMS kútý. Kezeksiz, barmaı-aq, bári úıden shyqpaı jasalady. Atalǵan servıs shamamen 1 mıllıon adamnyń Halyqqa qyzmet kórsetý ortalyǵyna barý qajettiligin joıady, — deıdi sala mınıstri.

Buǵan deıin Jaslan Mádıev eGov portalyn jańǵyrtý jumystary qalaı júretinin aıtyp bergen edi.

Aıta keteıik, ótken jyly Qazaqstanda memlekettik qyzmettiń 91% onlaın kórsetilgen. «Ulttyq qor — balalarǵa», «Stop-kredıt», «Kólik ıelený tarıhy», «Qumar oıyndarǵa qatysýdan erikti túrde bas tartý» sekildi tanymal servıster iske qosylǵan.

Sondaı-aq, eGov arqyly kedergi keltirgen kólik ıelerine anonımdi habarlama jiberýge bolady.