Jeke kýálik alý qansha turady jáne kimder tegin alady
ASTANA. KAZINFORM — Abaı oblysy PD Kóshi-qon basqarmasynyń baspasóz qyzmeti 2026 jyldan bastap jeke basyn kýálandyratyn qujattar úshin memlekettik baj qansha ekenin jáne tólemnen bosatylý tártibin túsindirdi.
2026 jylǵy 1 qańtardan bastap aılyq eseptik kórsetkish (AEK) 4 myń 325 teńge boldy. Osyǵan baılanysty jeke basty kýálandyratyn qujattardy berý úshin memlekettik baj mólsheri de ózgerdi.
Atap aıtqanda:
Qazaqstan Respýblıkasy azamatynyń pasporty myna kólemde:
- 24 bet — 17 myń 300 teńge (4 AEK) (16 jasqa deıingi balalar úshin);
- 36 bet — 34 myń 600 teńge (8 AEK);
- 48 bet — 51 myń 900 teńge (12 AEK);
Sonymen qatar Qazaqstan Respýblıkasy azamatynyń jeke kýáligi, sheteldiktiń Qazaqstan Respýblıkasynda turýyna yqtııarhaty — 865 teńge (0,2 AEK) kóleminde bolady. Budan bólek:
- bir jyldyń ishinde eki retten kóp joǵalýyna baılanysty Qazaqstan Respýblıkasy azamatynyń jeke kýáligi — 4 myń 325 teńge (1 AEK);
- azamattyǵy joq adamnyń kýáligi (AJA)– 34 myń 600 tenge (8 AEK).
Vedomstvo málimetinshe, Qazaqstan Respýblıkasynyń 2025 jylǵy 18 shildedegi Salyq kodeksinde (budan ári — Kodeks) jeke basyn kýálandyratyn qujattardy bergeni úshin memlekettik baj alý obektileri men mólsherlemeleri bóliginde túzetýler engizilgen.
— Kodekstiń 664-baby 1-bóligi 8)-tarmaqshasyna sáıkes bosqyn kýáligin, Qazaqstan Respýblıkasy azamatynyń jeke kýáligin alǵash ret jáne jaramdylyq merziminiń aıaqtalýy boıynsha berýdi qospaǵanda, jeke basty kýálandyratyn qujattardy bergeni úshin memlekettik baj alynady. Osylaısha, QR azamatynyń jeke kýáligin alýǵa alǵash ret ótinish bildirgen adamdar (16 jasqa tolǵanda, onyń ishinde 18 jastan asqan adamdar); 1974 jylǵy úlgidegi burynǵy KSRO pasportynyń negizinde nemese ony joǵaltýyna baılanysty qalpyna keltirý; (Qazaqstan Respýblıkasynyń azamattyǵyn qabyldaý), sondaı-aq jaramdylyq merziminiń aıaqtalýyna baılanysty aýystyrǵan kezde memlekettik baj tóleýden bosatylady, — delingen habarlamada.
Sondaı-aq, Kodekstiń 667-baby 3-bóligi 2)-tarmaqshasyna sáıkes 1 (bir) jyldyń ishinde eki retten kóp joǵalýyna baılanysty jeke kýálikti bergeni úshin memlekettik baj mólsheri 0,2 AEK ornyna 1 AEK quraıdy. (4 myń 325 teńge)
Abaı oblysy PD Kóshi-qon basqarmasy atap ótkendeı, qabyldanǵan túzetýler negizgi qujattardy alý rásimderin jeńildetýge jáne azamattarǵa qarjylyq júktemeni azaıtýǵa, sonymen birge qujatty uqypty saqtaý jaýapkershiligin jáne onyń joǵalýy úshin jaýapkershilikti saqtaýǵa baǵyttalǵan.
Budan buryn 2026 jyly kópbalaly otbasylardyń járdemaqysy qanshalyqty kóbeıgenin jazǵanbyz.