Jeke kýálik, pasport berilgende qazaqstandyqtardan saýsaq izi alynady

ASTANA. QazAqparat – Keler jyldyń 1 qańtarynan jeke kýálik, pasport, sheteldiktiń Qazaqstanda turýyna ruqsat etetin yqtııarhatyn berý kezinde onyń ıesinen saýsaq izderi alynbaq, dep habarlaıdy QazAqparat tilshisi.

«Jadynyń syıymdylyǵy keminde 64 Kb bolatyn mıkroshemada Qazaqstan Respýblıkasy azamatynyń, onyń ishinde adamnyń azamattyǵy men zańdy mekenjaıy, fotosýreti men qoly, 16 jasqa tolǵan jáne «Daktıloskopııalyq jáne genomdyq tirkeý týraly» 2016 jylǵy 30 jeltoqsandaǵy QR Zańynda belgilengen jaǵdaılar boıynsha 12 jastan asqan qujat ıesiniń saýsaq izderi týraly grafıkalyq jáne mátindik aqparat qorǵalǵan túrde saqtalady», - delingen Ashyq NQA portalynda jarııalanǵan Іshki ister mınıstriniń buıyryq-jobasynda.

Sondaı-aq qujatta jazylǵandaı, saýsaq izderi azamattardyń jeke kýáliginde, sheteldiktiń Qazaqstanda turýyna ruqsat etetin yqtııarhatynda, azamattyǵy joq adamnyń kýáligine de ornalastyrylady.

«Bul – «Daktıloskopııalyq jáne genomdyq tirkeý týraly» 2016 jylǵy 30 jeltoqsandaǵy QR Zańyna sáıkes 2024 jylǵy 1 qańtardan bastap saýsaq izin tirkeý talabynyń kúshine enýine baılanysty», - dep túsindirme berilgen buıryq-jobasyna.

Qujat 20 shildege deıin kópshilik talqylaýda bolady.