Jeke kýáligin bógde adamǵa ustatqandar bank boryshkerine aınalǵanyn bilmeı qalǵan - SQO
PETROPAVL. QazAqparat - Jeke kýáligin «sheteldik kompanııadanmyn» degen alaıaqqa ustatqan soltústikqazaqstandyq turǵyndar qalaısha bank boryshkerine aınalǵanyn bilmeı qalǵan, dep habarlaıdy QazAqparat tilshisi.
SQO ІІD baspasóz qyzmetinen habarlaǵandaı, Petropavl qalasynyń birneshe turǵyny ózderiniń qalaısha bank jáne mıkroqarjylyq uıymdardyń boryshkeri ekenin bilmeı qalǵanyn aıtyp aryzdanǵan.
«Jedel-izdestirý sharalary barysynda 23 jastaǵy Petropavl qalasynda turatyn boıjetken qolǵa tústi. Jelilik marketıng boıynsha jumys júrgizetin shetel kompanııasynyń ókili retinde ózin tanystyrǵan ol «klıentteriniń» senimine kirip, olardyń jeke kýáligin «kompanııamen yntymaqtasý baǵdarlamasyna tirkeımin» dep alyp otyrǵan. Al shyntýaıtyna kelgende ınternet-bankıng arqyly ol jábirlenýshilerdiń atynan nesıe alǵan», - delingen habarlamada.
Tergeýshiler ákki boıjetkenniń 19 qylmys faktisine qatysy baryn anyqtap otyr. Alaıaq jábirlenýshilerdiń jalpy 1 mıllıon teńgege jýyq aqshasyn jymqyrǵan. Qazirgi ýaqytta ol Qylmystyq kodekstiń 190-baby 2-bóligi boıynsha (alaıaqtyq) jaýapkershilikke tartylýda.
«Qandaı jaǵdaı bolmasyn jeke qujattaryńyzdy bógde adamǵa berýge asyqpańyz. Bóten adamdardyń atynan nesıe alý úshin alaıaqtar buryn kúrdeli kombınatsııalardy júzege asyratyn. Al qazir ınternet-bankıngtiń múmkindikteri qylmyskerlerge adamdardyń jeke málimetterine qol jetkizý arqyly alaıaqtyqqa barýyna jol ashady», - dep eskertedi SQO ІІD qylmystyq polıtsııa basqarmasynyń bastyǵy Petr Klımov.
