Jeke kólikti uıaly telefon arqyly rásimdeýge qashan jetemiz
Astana memlekettik qyzmet xabynyń tóraǵasy Álıxan Baımenovtyń aıtýynsha, kelesi kezeńde ár azamat smartfon arqyly kóptegen memlekettik qyzmetterdi tikeleı alýy qajet
«Biz bir orynda toqtap qalmaýymyz qajet. Kelesi kezeń ol - ár azamattyń smartfon arqyly kóptegen memlekettik qyzmetterdi tikeleı alýy. Bul qazirgi jumysty odan da jyldamdatady ári yńǵaıly etedi. Ol úshin memlekettik organdardyń aqparattyq bazalary kóbirek ashylýy qajet. Sonda anyqtamany alýdyń qajeti de bolmaı qalady. Barlyǵy ınternette saqtalady. Ondaıda, eń bastysy, aqparattardy qorǵaýǵa basa nazar aýdarǵan jón», - dedi Baımenov QazAqparat tilshisine bergen suxbatynda.
Hab basshysynyń oıynsha, búginde jeke aqparattardy tasymaldaý jelilerin (memorgandar men xalyqqa qyzmet kórset ortalyqtary arasyndaǵy jeliler - avt.) qorǵaýdan góri aqparattyń ózin barynsha qorǵaý jumysyna basymdyq berý kerek.
«Ol aqparat qupııalanyp shyǵýy kerek. Ár adam óziniń paraqshasyna kimniń kirgenin bilip otyrýy qajet. Osy oraıda Estonııanyń tájirıbesi mańyzdy. Atalǵan memleket «elektrondyq úkimetti» damytý jaǵynan úzdik bestikke kiredi. Máselen, estondar qala men aýdan ákimdikteriniń kireberisin shaǵyn xalyqqa qyzmet kórsetý ortalyqtary sııaqty jasap qoıǵan. Sol jerde xalyq tarapynan jıi túsetin máseleler boıynsha mamandar otyrady. Kelgen adam elektrondy kezekke turyp, kókeıinde júrgen saýalǵa jaýap ala alady. Ol da jemqorlyqqa qarsy shara bolsa kerek. Negizi, Astana ákimdiginiń ókilderi bizben birge Estonııaǵa baryp kelgennen keıin osy tájirıbeni qolǵa alǵan bolatyn. Árıne, qazirgi kezde bizdiń HQKO-lar óz mindetin atqarýda. Olar áli de kerek. Biraq strategııalyq maqsatymyzdyń biri - ár adamnyń memqyzmetterdi tikeleı alýy», - dep atap kórsetti Á.Baımenov.
Osy oraıda Estonııanyń taǵy bir tájirıbesin atap ótken jón. Ol jerde jeke kólikti satqanda ony eshbir qaǵazsyz rásimdeıdi. "Iá, estondyqtar kólikti bir-birine satqanda eshqandaı ortalyqqa da, eshqandaı memlekettik organǵa da barmaıdy. Eki adam uıaly telefon arqyly ony bir-biriniń atyna aýdara salady. Bizge osy baǵytta júrý kerek. Bunyń barlyǵy túptiń-túbinde xalyqtyń ómirin jaqsartady", - deıdi xab basshysy.
Aıta keteıik, búgin Túrkııanyń Ystanbul qalasynda memlekettik organdardyń tıimdiligin baǵalaý salasyndaǵy Qazaqstannyń tájirıbesi keńinen tanystyryldy. Atalǵan shara baǵalaý salasyndaǵy ulttyq áleýetke arnalǵan V Jahandyq konferentsııa aıasynda ótip otyr . Álıxan Baımenovtyń aıtýynsha, aldaǵy ýaqytta memorgandardyń tıimdiligin baǵalaýǵa arnalǵan aımaqtyq semınardy uıymdastyrý josparlanyp otyr. Budan bólek, osy saladaǵy tájirıbemen jan-jaqty almasý maqsatynda alıans qurylady. Oǵan Estonııa, Koreıa syndy "elektrondy úkimetti" damytýdyń úzikteri kiretin bolady. Hab basshysy QR Respýblıkalyq bıýdjettiń atqarylýyn baqylaý jónindegi Esep komıtetiniń quziretin keńeıtýdi usyndy .
