Jeke kólik ıeleri qıyndyqqa tap bolýy múmkin - Isekeshev
ASTANA. QazAqparat - Astananyń jol ınfraqurylymyn damytý aıasynda negizgi basymdyq jaıaý júrginshilerge, velosıpedshilerge jáne qoǵamdyq kólikterge beriledi.
Bul týraly búgin elordada «Astana qalasynyń kólik kesheniniń damý úrdisi» atty konferentsııada qala ákimi Áset Isekeshev málim etti.
«Biz Astanany ómir súrýge barynsha yńǵaıly qalaǵa aınaldyrýǵa nıettimiz. Ol úshin qalalyq ınfraqurylymdy ózgertý, turǵyn úı-kommýnaldyq sharýashylyq salasy men qyzmet kórsetý baǵyttaryn jaqsartý, jańa tehnologııalardy engizý men «Smart sıtı» qalyptastyrý qajet. Jol-kólik keshenin damytý aıasynda sapaly joldar, kópirler men ınfraqurylymnyń basqa da elementterin salý qarastyrylǵan. Qazirgi kezde arnaıy baǵdarlama ázirlendi»,-dedi qala ákimi.
Astana halqynyń turǵyndary 1 mıllıonnan asyp ketkenine toqtalǵan Á. Isekeshev, búginde shaharda kólik sany artqanyn, osy oraıda qalaǵa ózge óńirlerden kelgen tranzıttik avtomobılderdi qosa eseptegende 500 myńǵa jetetinin jetkizdi. Qaladaǵy kóliktik júıe 952 kósheden turady, al joldardyń jalpy uzaqtyǵy 950 shaqyrymnan asady.
«Halyqtyń avtomobılge otyrýy qarqyny turǵyndar sanynyń jyldyq deńgeıde artýy kóleminen eki ese artyp otyr. Bul óz kezeginde ınfraqurlymǵa eleýli túrde júk túsirip otyr jáne kólik keptelisteri oryn alýda»,-dedi ákim.
Osy rette ol jol jelisin damytý men qaıta jańǵyrtý jumystary aıasynda basymdyq jaıaý júrginshilerge, velosıpedshilerge jáne qoǵamdyq kólikterge beriletinin, tek sodan keıingi orynda avtokólikter bolatynyn qadap aıtty.
«Bul qadamdar álemdik trendterge sáıkes keledi. Árıne, bul sharalar avtomobılmen júretin qalalyqtardyń narazylyǵyn týdyratyny belgili, alaıda kóliktik keshen qoǵamdyq ıgilik retinde joǵaryda atalǵan basymdyqtardy eskerýi tıis»,-dedi Á. Isekeshev.
