Jeke kóligimen júrýden bas tartqan brıtandyqtarǵa 4,2 myń dollar tólenedi
NUR-SULTAN QazAqparat - Ulybrıtanııa bıligi qorshaǵan ortany barynsha lastaıtyn avtomobılderdiń ıeleri kólikterinen bas tartyp, qoǵamdyq kólik, velosıped, elektroskýter, karsherıng nemese taksı qyzmeti paıdalanatyn bolsa, onda olarǵa 3 myń fýnt sterlıng (4,2 myń dollar) tólemek. Bul jaıynda QazAqparat The Times gazetine silteme jasap habarlaıdy.
El Úkimetiniń qoldaýymen joldardaǵy keptelisti qysqartý jáne aýa sapasyn jaqsartýǵa baǵyttalǵan ilki joba osy jyldyń kókteminde Koventrı qalasynda bastalmaq. Ótemaqy 2006 jyldan 2016 jylǵa deıin konveıerden shyqqan dızeldi jáne benzındi qozǵaltqyshy bar avtomobıl ıelerine usynylady. Baǵdarlama 2 jylǵa eseptelip otyr. Atalǵan merzim aıaqtalǵan soń onyń tıimdiligine baǵa beriledi.
Birikken Koroldiktiń Kólik mınıstrligi usynǵan málimetke sáıkes, 2019 jyly brıtandyqtar kólikterimen 574 mlrd shaqyrym jol júrgen. Bul osydan 5 jyl burynǵy kórsetkishten 11 paıyzǵa kóp.
Velosıped jáne jaıaý júrginshi máseleleri jónindegi qaıyrymdylyq uıymynyń basshysy Ksave Brıstyń aıtýynsha, Ulybrıtanııada kómirqyshqyl gazy shyǵaryndysynyń basym bóligi kólikterge tıesili bolyp otyr. Bul jaıt jyl saıyn el ekonomıkasyna mıllıardtaǵan dollar shyǵyn ákeledi.
