Jeke keńistikti buzǵandarǵa qatań jaza: stalkıngke qarsy zań qabyldandy

ASTANA. KAZINFORM — Endi adamnyń jeke shekarasyn buzyp, erkinen tys onyń izine túsip, qaıta-qaıta telefon soǵyp qorqynysh sezimin uıalatqandar qylmystyq jaýapkershilikke tartylady, dep habarlaıdy Polisia.kz.

Іshki ister mınıstrligi baspasóz qyzmetiniń málimetinshe, «Qazaqstan Respýblıkasynyń keıbir zańnamalyq aktilerine qylmystyq zańnamany ońtaılandyrý máseleleri boıynsha ózgerister men tolyqtyrýlar engizý týraly» Zańnyń qabyldanýy azamattardyń quqyqtaryn qorǵaý isinde mańyzdy qadam boldy.

— Bul zańdaǵy basty jańalyqtardyń biri — «stalkıng» úshin qylmystyq jaýapkershiliktiń engizilýi. Stalkıng — bul zorlyq-zombylyq qoldanylmasa da, adamnyń psıhologııalyq jaǵdaıyna eleýli zııan keltiretin, erkinen tys turaqty túrde qýdalaý, artynan qalmaý áreketteri. Stalkıngke mynadaı is-áreketter jatady: aıtarlyqtaı zııan keltirip, adamnyń jeke shekarasyn buzyp, erkinen tys onyń izine túsý, qaıta-qaıta telefon soǵý, ınternet arqyly baqylaýmen qorqynysh nemese alańdaýshylyq sezimin týdyrý. Endi mundaı áreketter úshin 200 aılyq eseptik kórsetkishke deıin aıyppul salý, 200 saǵatqa deıin qoǵamdyq nemese túzeý jumystaryna tartý, 50 táýlikke deıin qamaýǵa alý túrindegi jaza qarastyrylǵan, — dep eskertti vedomstvo.

Zań árbir adamnyń jeke keńistigine qurmetpen qaraý qajettigin aıqyndap, psıhologııalyq zorlyq-zombylyq pen qýdalaýdyń aldyn alýǵa baǵyttalǵan.

Budan buryn habarlanǵandaı, búginnen bastap Qazaqstanda dropperlik jáne nekege májbúrlegeni úshin qylmystyq jaýapkershilik engizildi.