Jeke kásipkerlikti toqtatýdyń ońaı joly bar - mınıstrlik
ASTANA. KAZINFORM – Sońǵy ýaqytta jeke kásipkerlik ashyp alyp, keıin ony jabý kezinde túsinbeýshilikke tap bolatyndar kóp. Bul rette, QR Qarjy mınıstrligi Memlekettik kirister komıteti Memlekettik kórsetiletin qyzmet basqarmasynyń basshysy Dýman Qanseıitov jeke kásipkerlikti toqtatý tártibi týraly aıtyp berdi.
Ol jekelegen sanattar boıynsha jeke kásipkerlikti ońaılatylǵan tártippen toqtatýǵa múmkindik bar ekenin atap ótti.
«Ol úshin QQS tóleýshi retinde esepte turmaýy kerek. Qala berdi, birlesken kásipkerlik nysanynda qyzmetti júzege asyrmaıtyndar, jekelegen qyzmet túrlerin júzege asyrmaıtyndar, táýekelderdi baǵalaý júıesi is-sharalarynyń nátıjeleri boıynsha iriktemeli salyqtyq tekserýler tiziminde joq azamattar, táýekel dárejesin baǵalaý negizinde erekshe tártip boıynsha júrgiziletin salyqtyq tekserýlerdiń jartyjyldyq kestesinde joq jeke kásipkerlik ıeleri, salyq, áleýmettik tólemder boıynsha bereshegi joq azamattar, táýekelderdi basqarý júıesi boıynsha táýekelderdiń joǵary deńgeıi joq tulǵalar jeke kásipkerlikti ońaılatylǵan tártippen toqtatýǵa múmkindik ala alady», - dedi ol.
Mundaı talaptarǵa saı kelse, jeke kásipkerlik ıesi óziniń ornalasqan jeri boıynsha salyq organyna bir mezgilde qyzmetin toqtatý týraly salyqtyq ótinishti, taratý salyq eseptiligin jáne baqylaý-kassa mashınalaryn esepten shyǵarý týraly salyqtyq ótinishti (eger bar bolsa) tapsyrý qajet.
Salyq organy salyq mindettemesi oryndalǵan kúnnen bastap 3 jumys kúninen keshiktirmeı jeke kásipkerlikti tirkeý esebinen shyǵarady. Tirkeý esebinen shyǵarý týraly aqparatty ýákiletti organnyń ınternet-resýrsynda ornalastyrady. Sondaı-aq salyq tóleýshi óziniń jeke kabınetinen de ózgeristerdi teksere alady.
