Jeke kásipkerlikke qaıtarymsyz sýbsıdııa berýdi toqtatý kerek — Sabılıanov

ASTANA. KAZINFORM — Kásipkerlik sýbektisi qyzmetin toqtatqan jaǵdaıda memleketten alǵan qoldaýdy tolyq kólemde qaıtarýǵa mindetteý kerek. Bul týraly Májilistiń jalpy otyrysynda depýtat Nurtaı Sabılıanov aıtty.

— Jeke kásipkerlik sýbektilerine memleket tarapynan kórsetiletin qoldaý sharalary áleýmettik-ekonomıkalyq turǵydan áser berýge tıis. Memlekettik qoldaý alǵan kásipkerlik sýbektileri óz qyzmetin toqtatqan jaǵdaıda, kásiporyn, onyń quryltaıshylary men aktsıonerleri kórsetilgen memlekettik qoldaýdy tolyq kólemde memleketke qaıtarýdy mindetteý kerek, — dedi ol.

Májilis depýtatynyń aıtýynsha, Úkimet ekonomıkany damytý maqsatynda jeńildetilgen nesıe berý júıesin qalyptastyrýy qajet.

— Atap aıtqanda, kásipkerlik sýbektilerine jyldyq 8–10 paıyz mólsherlememen nesıe berý tetigin engizý kerek. Qaıtarymsyz sýbsıdııa berý tájirıbesin toqtatý qajet. Sebebi sońǵy 3,5 jylda bıznes sýbektilerin qoldaý maqsatynda bıýdjetten bankterdiń syıaqy mólsherlemesin sýbsıdııalaýǵa 686 mlrd teńge jumsalǵan. Joǵary aýdıtorlyq palata júrgizgen memlekettik aýdıt ýákiletti organdardyń, damý ınstıtýttarynyń, ákimdikterdiń jumysynda kemshilikter bar ekenin kórsetti. Ony joıyp, qatemen jumys isteý kerek, — dedi Nurtaı Sabılıanov.

Aıta keteıik, Májilistiń jalpy otyrysynda depýtattar Joǵary aýdıtorlyq palatanyń jeke kásipkerlerge memlekettik qoldaý sharalarynyń tıimdiligine qatysty esebin tyńdap otyr.

Otyrys barysynda Joǵary aýdıtorlyq palatanyń tóraǵasy Álıhan Smaıylov bıznesti qoldaý tetikteriniń kemshiligin atady.