Jeke kásipkerlerdiń medıtsına salasyna kirýine esh kedergi joq – mınıstr

ASTANA. KAZINFORM – Densaýlyq saqtaý mınıstri Aqmaral Álnazarova medıtsına salasyna ınvestıtsııa quıǵysy keletin kásipkerlerge jol ashyq ekenin jetkizdi.

- MÁMS júıesi aıasynda jeke kásipkerlerge múmkindik ashyldy. Medıtsınalyq qyzmet kórsetetin uıymdardyń 64 paıyzy jeke menshik. Alaıda, biz jeke menshik uıymdarmen jumys isteýde tsıfrlandyrý júıesiniń aqsap turǵanyna baılanysty tıisti monıtorıngti júrgize almaı otyrmyz. Sondyqtan bul ekijaqty másele, bizdiń maqsat – halyqqa medıtsınalyq qyzmetti tıisti deńgeıde, sapaly uıymdastyrý, - dedi Aqmaral Álnazarova Májiliste MÁMS júıesi týraly zań jobasyn tanystyra turyp.

Odan ári mınıstr medıtsına salasyna ınvestıtsııa salǵysy keletin jandarǵa jańalyǵymen bólisti.

- Investıtsııa kelisimi degen jańa tásil bar, bul ınvestıtsııa quıamyn degen jeke kásipkerlerge óte ońtaıly. Búginde jeke kásipkermen Qosshy qalasynda quny 28 mldr teńge turatyn aýrýhananyń qurylysy boıynsha 10 jylǵa kelisim jasadyq. Jeke kásipkerlerdiń medıtsına salasyna kirýine eshqandaı kedergi joq, tarıf barlyǵyna birdeı, - deıdi ol.

Aıta keteıik, búgin Májiliste «Mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótip jatyr.

Eske sala keteıik, bıyl 12 naýryzda Májilis mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly zań jobasyn qaraýǵa aldy.