Jeke kásipkerlerdiń 70 paıyzǵa jýyǵy tabysyn jasyryp otyr — Erjan Birjanov

ASTANA. KAZINFORM — QR Qarjy vıtse-mınıstri Erjan Birjanov elimizde salyq tólemeı júrgen kásipkerler men mobıldi aýdarymdarǵa qatysty túsinik berdi.

«Qazirgi kezde kóp salyq tóleýshi tirkeýde túr. Biraq olardyń birazy salyq nysanasynda nóldik kórsetkish kórsetip otyr. 2023 jylǵy birinshi jartyjyldyǵynyń qorytyndysy boıynsha 1,4 mln jeke kásipkerdiń ishinde nóldik kórsetkishti 944 myń salyq tóleýshi kórsetti. Bul óz kezeginde 67 paıyzǵa teń», — dedi K. Birjanov Senattyń jalpy otyrysynan keıin tilshiler suraǵyna jaýap bere otyryp.

Bul turǵyda ol 30 paıyzy zańdy túrde salyq tólep jatqanyn aıtty.

«Qalǵan 67 paıyzy salyq tólemeıdi, nóldik kórsetkish kórsetedi. Ulttyq banktiń deregine júginsek, barlyq tólem bank kartochkasy arqyly ótken. Máselen, bárińiz dúkennen taýar satyp alasyzdar. Olardyń aınalymy bir jyldyń ishinde 55 trln teńge boldy. Al mobıldi aýdarymdardyń somasy 80 trln teńgeni quraǵan. Túsinesiz be? Bul rette, tólemderdiń bir bóligi salyq alańynda bolmaǵanyn, tólenbegenin baıqatyp otyr. Bul óz kezeginde jergilikti jerdegi bıýdjet shyǵyny sanalady. Qazirgi kezde áleýmettik salanyń damýyna úles qosý úshin osy tólemlerdi tóleý kerek», — dedi vıtse-mınıstr.

Onyń paıymynsha, eldi mekenderdegi áleýmettik nysandardy tolyqtaı qamtamasyz etý úshin salyqtan jaltarýǵa jol bermeý kerek.

«Balalar jaryq ári jyly mektepte oqýy tıis. Halyq jaqsy em alýy kerek. Eger jeke kásipkerler osy 80 trln teńgeden salyq tólemese, olardyń jaǵdaıy qıyn bolady. Sondyqtan osy aqparatty durys jetkizýdi suraımyn», — dedi Erjan Birjanov.