Jeke kásipkerler úshin ońaılatylǵan salyq rejımi qalaı ózgerdi – maman pikiri

ASTANA. KAZINFORM – 2026 jyldyń 1 naýryzynan bastap Qazaqstanda arnaıy salyq rejımderiniń jańa tártibi kúshine enedi. Endi kásipkerler men ózin-ózi jumyspen qamtyǵan azamattar úsh rejımniń birin tańdaýy kerek.

Bul týraly Astana qalasy Saraıshyq aýdany boıynsha memlekettik kirister basqarmasy basshynyń orynbasary Darhan Moldajan Jibek Joly arnasyndaǵy «Búgin live» baǵdarlamasyna bergen suhbatynda málimdedi.

- Bıyl salyq salý júıesi ońtaılandyrylyp, burynǵy onǵa jýyq rejımniń ornyna naqty úsh arnaıy salyq rejımi bekitildi. Birinshi rejım – ońaılatylǵan salyq rejımi. Bıyl bul salyq túri keńeıtildi. Endi tabys shegi 2,5 mlrd teńgege deıin ulǵaıdy (buryn 20 000 AEK bolatyn). Osy rejımdi tańdaǵan jeke kásipkerler men zańdy tulǵalar tek tabys salyǵyn tóleıdi. Buryn tabys kólemi 60 mln teńgeden asqan jaǵdaıda qosymsha qun salyǵyn tóleý mindeti týyndaıtyn. Bıyldan bastap arnaıy salyq rejıminde bul shekteý alynyp tastaldy. Ekinshi rejım – fermerlik jáne sharýa qojalyqtaryna arnalǵan. Buryn bólek-bólek tólenetin jer salyǵy, kólik salyǵy jáne jeke tabys salyǵy biriktirilip, bir rettik tólem retinde engizildi. Biryńǵaı tólemniń bazalyq mólsherlemesi – 0,5 paıyz. Osylaısha, birneshe salyq túri bir tólemmen almastyryldy, - dedi maman.

Al úshinshi rejım ózin-ózi jumyspen qamtyǵan azamattarǵa arnalǵan. Bul kásipkerler úshin de arnaıy ózgerister engizilgen.

- Úshinshi rejım – ózin-ózi jumyspen qamtyǵan azamattarǵa arnalǵan. Eger jeke tulǵanyń jyldyq tabysy 300 AEK-ten (shamamen 1,2 mln teńge) aspasa, oǵan jeke kásipker retinde tirkelýdiń qajeti joq. Mundaı azamattar «E-Salyq Business» mobıldi qosymshasy arqyly kórsetken qyzmeti boıynsha chek júktep otyrady. Eseptilik tapsyrý talap etilmeıdi jáne olar jeke kásipker retinde tirkelmeıdi. Bul rejım qyryqtan astam qyzmet túrine arnalǵan. Mysaly: taksı júrgizýshileri, jetkizýshiler, shashtarazdar jáne ózge de qyzmet kórsetýshiler, - dedi Darhan Moldajan.

Spıkerdiń aıtýynsha, salyq rejımin kásipkerler telefondaǵy «E-Salyq Business» qosymshasy nemese ekinshi deńgeıli bankter arqyly tańdaı alady. 1 naýryzǵa deıin sanaýly kúnder qaldy, úlgermegen jaǵdaıda ózge tártip qoldanylady.

- Kásipker 1 naýryzǵa deıin salyq rejımin óz erkimen tańdamasa, ol avtomatty túrde jalpyǵa birdeı salyq salý rejımine kóshiriledi. Bul rejım boıynsha tabys salyǵynyń bazalyq mólsherlemesi – 10 paıyz. Sonymen qatar bir jyl ishinde tabys kólemi 10 000 AEK-ten asqan jaǵdaıda qosymsha qun salyǵyn tóleý mindeti týyndaıdy. Bıyl qosymsha qun salyǵynyń mólsherlemesi 16 paıyzǵa deıin ósti, - dedi ol.

Osy tusta Darhan Moldajan kásipkerler salyq tóleý barysynda jıi jiberiletin qateler týraly da aıtty.

- Qazirgi ýaqytta jıi kezdesetin máseleniń biri – kásipkerdiń tirkelgen mekenjaıy men naqty qyzmet kórsetetin jeriniń ártúrli bolýy. Mysaly, kásipker Esil aýdanynda turyp, bıznesi Baıqońyr aýdanynda tirkelýi múmkin. Mundaı jaǵdaıda áleýmettik tólemder jeke tulǵanyń turǵylyqty jeri boıynsha tólenedi, al tabys salyǵy kásipkerlik nysany tirkelgen jer boıynsha tólenedi, - dedi Astana qalasy Saraıshyq aýdany boıynsha memlekettik kirister basqarmasy basshynyń orynbasary.

Mamannyń pikirinshe, jańa salyq rejımindegi basty ózgeris – tabys sheginiń 2,5 mlrd teńgege deıin ulǵaıýy jáne qosymsha qun salyǵy boıynsha shekteýdiń alynyp tastalýy. Búginde jeke kásipkerlik sýbektiler 90 paıyzdan asady. Bul kásipkerlerge tabys kólemin asyryp alamyn degen alańdaýshylyqsyz jumys isteýge múmkindik beredi dep málimdedi.

Eske sala keteıik, jaqynda elde qaıta óńdelgen aýyl sharýashylyǵy ónimderine salyq salý tártibi ózgermeıtini jaıly jazyldy.