Jeke kásipkerler úshin MÁMS: jarna men jeńildikter týraly neni bilý kerek
ASTANA. KAZINFORM — Áleýmettik medıtsınalyq saqtandyrý qory 2025 jyly jarnalardy qalaı durys ári yńǵaıly tóleýge bolatynyn túsindirdi, dep habarlaıdy Astana qalasy ákimdiginiń baspasóz qyzmeti.
Jeke kásipkerler úshin Mindetti áleýmettik medıtsınalyq saqtandyrý (MÁMS) júıesine jarnalardy turaqty túrde tólep otyrý mańyzdy. Bul — sapaly medıtsınalyq kómekke qol jetkizýge múmkindik beretin saqtandyrý statýsyn saqtaý joly.
Qansha jáne qalaı tóleý kerek?
Jeke kásipkerler men jeke praktıkamen aınalysatyn tulǵalar basqa da áleýmettik tólemdermen qatar MÁMS júıesine bekitilgen mólsherde jarna tóleıdi, bul — eń tómengi jalaqynyń (ETJ) 1,4 eselengen mólsheriniń 5%-y, ıaǵnı 2025 jyly — 5 950 teńge.
Eger kásipkerdiń jaldamaly jumyskerleri bolsa, ol olarǵa qosymsha jarna tóleýge mindetti:
• jumys berýshi esebinen — qyzmetker tabysynyń 3%-y (eń kóbi — 25 500 teńge),
• qyzmetkerdiń óz tabysynan — 2% (eń kóbi — 17 000 teńge).
Eger kásipker bir mezgilde jaldamaly qyzmetker retinde de jumys istese, ol jarnany eki tarap boıynsha: jeke kásipkerlik (JK) retinde jáne qyzmetker retinde de tóleýi tıis.
Keıbir sanat jarna tóleýden bosatylady, mysaly:
• qyzmeti toqtatylǵan JK;
• múgedektigi bar azamattar;
• zeınetkerler;
• marapattalǵan kópbalaly analar;
• kúndizgi bólimde oqıtyn stýdentter.
Al bala kútimi boıynsha demalysta júrgen áıelder, eger JK qyzmeti toqtatylmaǵan bolsa, jarna tóleýi tıis.
Nelikten ýaqytynda tóleý mańyzdy?
Jarnalardy aı saıyn nemese birneshe aıǵa aldyn ala tóleýge bolady. Ýaqytyly tólemeý bereshek pen ósimpuldyń jınalýyna, sondaı-aq MÁMS júıesindegi mártebeden aıyrylýǵa alyp keledi.
— Jarnalardy mindetti túrde tóleý — ár azamattyń sapaly medıtsınalyq kómekke qol jetkizýiniń kepili. Jeke kásipkerler bul talapty oryndaýy tıis, sebebi bul olarǵa tegin emdelýge quqyq beredi, — deıdi Áleýmettik medıtsınalyq saqtandyrý qorynyń resmı ókili Zabıra Orazalıeva.
Jarna tóleýden bas tartý múmkin emes, tipti kásipker jeke klınıkada emdelse de. MÁMS júıesi memlekettik te, jekemenshik mekemeler de kórsetetin qyzmetterdi qamtıdy. Eger JK qyzmetin toqtatsa, ol kásipker retinde jarna tóleýden bosatylady, biraq saqtandyrý mártebesin saqtaý úshin jarnalardy jeke ózi nemese jumys berýshi arqyly tóleı alady.
Jarnalar men aýdarymdardy bankter, mobıldi qosymshalar nemese «Qazposhta» AQ bólimsheleri arqyly 122 jáne 121 kodtary boıynsha tóleýge bolady. Eń bastysy JSN-di, aty-jónin jáne somany durys kórsetý qajet.
Budan buryn MÁMS aıasynda Qyzylorda oblysynda 144 ota tegin jasalatyny habarlandy.