Jeke kásipkerler MÁMS-ke qalaı jarna tóleıdi
ASTANA. KAZINFORM - Jeke kásipkerler men jeke praktıkamen aınalysatyn tulǵalar MÁMS-ke tabys kólemine qaramastan eń tómengi jalaqynyń 5% mólsherinde tirkelgen jarnalar tóleıdi. 2024 jyly jeke kásipkerler úshin tólem mólsheri 5 950 teńgeni quraıdy.
2024 jyldyń birinshi jartyjyldyǵynda Astana qalasy boıynsha 95 myńnan astam jeke kásipker 2,4 mlrd teńge kóleminde jarna tóledi. Jeke kásipker basqa áleýmettik aýdarymdar men salyqtarmen qatar, jarnalardy esepti kezeńnen keıingi aıdyń 25-inen keshiktirmeı aı saıyn tóleıdi.
Eger salyq esepterin berýdi toqtatqan nemese Qazaqstan Respýblıkasynyń salyq zańnamasyna saı áreketsiz dep tanylǵan jeke kásipkerler MÁMS júıesine jarna tólemeıdi. Eseretini, jeke kásipker salyq esepterin berýdi toqtatpasa, onyń tabysynyń mólsherine qaramastan jarnany tóleıdi.
Sondaı-aq, jeke kásipker kelesi jeńildik sanattarynyń birine kirse, jarna tóleýden bosatylady:
· Zeınetaqy tólemderin alýshylar, onyń ishinde UOS qatysýshylary men múgedekter;
· "Altyn alqa", "Kúmis alqa" alqalarymen, "Batyr ana" ataǵyn alǵan, "Ana dańqy" I jáne II dárejeli ordenderimen marapattalǵan kópbalaly analar;
· Múgedektigi bar adamdar;
· Orta, tehnıkalyq jáne kásiptik, ortadan keıingi, joǵary bilim berý uıymdarynda, sondaı-aq joǵary oqý ornynan keıingi bilim berý uıymdarynda kúndizgi oqý nysany boıynsha oqıtyndar.
Este saqtaý qajet:
Birinshiden. Jarnalardy ýaqytynda tólemegen jaǵdaıda, keshiktirilgen árbir kún úshin QR Ulttyq Banki bazalyq stavkasynyń 1,25 eselengen mólsherinde aıyppul esepteledi.
Ekinshiden. Eger jeke kásipker jarnalardy tóleýden jaltarsa, salyq organdary ÁQBtK-niń 92-1-babyna sáıkes, ákimshilik jazalaý sharalaryn qoldanady. Eger jarnalar boıynsha bereshek ótelmese, salyq organdary banktik shottar boıynsha shyǵys operatsııalaryn toqtatýy múmkin, ıaǵnı shottar buǵattalady.
Qandaı ákimshilik jazalaý sharalary qarastyrylǵan?
JK-nyń QMSJ-ǵa jarnalardy tólemeýi, ýaqtyly tólemeýi jáne (nemese) tolyq tólemeýi eskertý jasaýǵa ákeledi. Bir jyl ishinde qaıtalanǵan jaǵdaıda tólem jasamaǵanǵa aıyppul salynady:
· Shaǵyn kásipkerlik sýbektilerine - QMSJ-ǵa tólenbegen (aýdarylmaǵan), ýaqtyly tólenbegen jáne (nemese) tolyq tólenbegen (aýdarylmaǵan) aýdarymdar men (nemese) jarnalar somasynyń 20% mólsherinde;
· Orta kásipkerlik sýbektilerine – 30% mólsherinde;
· Іri kásipkerlik sýbektilerine – 50% mólsherinde.
QMSJ-ǵa jarnalardy tólemegendikten bereshek qalyptasqan jáne shottar buǵattalǵan jaǵdaıda ne isteý kerek?
Birinshiden, salyq tóleýshiniń kabınetinde (Memlekettik kirister komıtetiniń saıtynda nemese e-salyq mobıldi qosymshasynda) salyq organy habarlamasyn taýyp, shottardyń buǵattalý sebebin anyqtaý qajet nemese JK tirkelgen jerdegi salyq organyna júginý qajet.
Ári qaraı, bereshekti (jarnalar, aıyppuldar nemese ósimpuldar) tóleý qajet. Muny kez kelgen ekinshi deńgeıdegi bank bólimshesi, onyń ishinde bankterdiń mobıldi qosymshalary, sondaı-aq «Qazposhta» AQ arqyly jasaýǵa bolady.
2-3 jumys kúni ishinde qarajattyń qaıtarylýyn tekserýdi umytpańyz. Eger JSN nemese TAÁ, tólem somasy, tólem maqsatynyń kody durys kórsetilmese, jarnalar qaıtarylýy múmkin.
