Jeke kásipkerler kıno óndirisine jyl saıyn 20 mlrd teńgeden astam qarajat salady – Arman Qyryqbaev
ASTANA. KAZINFORM – Kreatıvti ındýstrııany qoldaýǵa 2027 jyly 1,2 mlrd teńgeden astam qarjy bólinedi. Bul týraly Mádenıet jáne aqparat mınıstri Arman Qyryqbaev aıtty.
Búgin Quryltaı otyrysynda depýtat Sholpan Karınova 2027–2029 jyldarǵa arnalǵan respýblıkalyq bıýdjet jobasynda kreatıvti ekonomıkany damytýǵa bólinetin qarajattyń jetkiliktiligine qatysty másele kóterdi. Onyń aıtýynsha, aldaǵy úsh jylda kreatıvti ındýstrııanyń jalpy ishki ónimdegi úlesin 3%-ǵa jetkizý, óńirlik habtardyń ınfraqurylymyn damytý jáne avtorlyq quqyqty qorǵaýdyń tsıfrlyq platformalaryn jetildirý mindetteri tur.
Arman Qyryqbaevtyń aıtýynsha, bıýdjet shyǵystaryn ońtaılandyrý aıasynda kreatıvti ındýstrııaǵa bólinetin memlekettik qarjy da qysqaryp otyr.
— Bıyl bul salaǵa 1 mlrd 380 mln teńge bólindi. Kelesi jyly 1 mlrd 200 mln teńgeden astam, al odan keıingi jyly 1 mlrd teńgege jýyq qarjy qarastyrylady, — dedi mınıstr.
Sonymen qatar ol memlekettik bıýdjet kreatıvti ındýstrııany qarjylandyrýdyń jalǵyz kózi emes ekenin atap ótti. Lotereıa týraly zańǵa sáıkes, ulttyq lotereıa aınalymynyń 3%-y jyl saıyn osy salaǵa baǵyttalady. Bul shamamen 1-1,5 mlrd teńge.
Onyń túsindirýinshe, memleket qoldaýy qalyptasqan bızneske ǵana emes, jastarǵa, startaptarǵa jáne kreatıvti ındýstrııada jumys isteıtin mamandarǵa baǵyttalady. Qarajat oqytýǵa, ınnovatsııalyq jobalardy qoldaýǵa, sondaı-aq tájirıbe almasýǵa múmkindik jasaýǵa jumsalady.
— Búginde kreatıvti ındýstrııanyń ekonomıkaǵa qosyp otyrǵan úlesi 2,7 trln teńgege jetti. Bul sala qazirdiń ózinde memleket qazynasyna jyl saıyn 200 mlrd teńgeden astam salyq tólep otyr, — dedi Arman Qyryqbaev.
Mınıstr kınoındýstrııany mysalǵa keltirdi. Onyń aıtýynsha, memleket bul salaǵa jyl saıyn 5 mlrd teńge bóledi. Al kıno naryǵynyń jalpy kólemi mamandardyń baǵalaýynsha, 45–50 mlrd teńgeden asady. Jeke kásipkerler de kıno óndirisine jyl saıyn 20 mlrd teńgeden astam qarajat salady.
Buǵan deıin Qarjy mınıstri respýblıkalyq bıýdjettiń negizgi kórsetkishterin ataǵan edi.
