Jeke kásipker Berdenovanyń kim ekenin bilmeımiz – Sársen Quranbek

ShYMKENT. KAZINFORM – Shymkent qalasy ákiminiń orynbasary Sársen Quranbek áleýmettik jelilerde taraǵan aqparatqa túsinikteme berdi.

Jelide jeke kásipker Berdenovanyń memlekettik satyp alý konkýrstarynda jeńiske jetkeni, onyń qala ákiminiń orynbasary Rýslan Berdenovke týystyq qatysy bar-joǵy týraly suraqtar qoıylyp, aqparattar taraǵan bolatyn.

– Biz jeke kásipker Berdenovanyń kim ekenin bilmeımiz. Ol Rýslan Arysbekuly Berdenovke eshqandaı da qatysy joq. Famılııa uqsastyǵy – jaı sáıkestik, – dedi Sársen Quranbek.

Ákim orynbasarynyń aıtýynsha, bul jeke kásipker 2021 jyly bes konkýrstyń jeńimpazy atanǵan. Al 2024 jyly úsh konkýrs boıynsha kelisimshart alǵan. Qazir ystyq tamaq uıymdastyrýǵa baılanysty jarııalanǵan 16 konkýrstyń ishinen beseýinde jeńimpaz retinde anyqtalyp otyr.

– Berdenova esimdi jeke kásipkerdiń Shymkent qalasy ákimdigine nemese onda qyzmet etetin memlekettik qyzmetkerlerge esh qatysy joq. Onyń ishinde qala ákiminiń orynbasary Rýslan Berdenovke de, – dep naqtylady Sársen Quranbek.

Sondaı-aq ol jelidegi keıbir boljamdar men qaýesetterdiń negizsiz ekenin aıtyp, mundaı saýaldardy orynsyz dep baǵalady.

Aıta keteıik, budan buryn Shymkentte taksıdi taspen urǵan boıjetken qamaýǵa alynǵanyn jazǵan bolatynbyz.