Jeke kásipkerlikti bank qosymshalary arqyly ashýǵa bolady
NUR-SULTAN. QazAqparat - Dara kásipker retinde qyzmettiń bastalǵany týraly habarlamany www.egov.kz portalynda, sondaı-aq Kaspi.kz, Halyk Bank bank qosymshalaryna jiberýge bolady, dep habarlaıdy QazAqparat tilshisi.
Jeke kásipkerlikti ashý úshin jeke tulǵadan dara kásipker retinde qyzmettiń bastalǵany týraly habarlama jiberý jetkilikti.
«Budan bylaı qazaqstandyqtar Halyk Bank mobıldi qosymshasynda iske asyrylǵan jańa servıstiń kómegimen úıden shyqpaı-aq jeke kásipkerlikti tirkeı alady. Osyǵan deıin bul habarlamany www.egov.kz elektrondyq úkimet portalynda, sondaı-aq Kaspi.kz qosymshasynda jiberý múmkindigi bolǵan», - delingen QR QM Memlekettik kirister komıteti baspasóz qyzmetiniń málimetinde.
Habarlamany Halyk Bank qosymshasynda birneshe batyrmany basý arqyly jiberýge bolady. «JK bolý» siltemesi boıynsha ótse jetkilikti. Odan keıin, júıe aldaǵy qadamdardy usynady. Sondaı-aq, jeke kásipkerlikti ashýdyń barlyq protsesi 5 mınýttan aspaıdy.
Eskere ketetin jaıt, nysandy toltyrý kezinde jeke tulǵa qyzmetti júzege asyrýdy josparlap otyrǵan oblystyń memlekettik kirister organynyń kodyn, dara kásipkerdiń ataýyn, mekenjaıyn, júzege asyrylatyn qyzmet túrin, sondaı-aq salyq salý rejımin tańdaýy kerek.
Habarlamaǵa jeke tulǵanyń elektrondy tsıfrlyq qoltańbasymen qol qoıý kerek. Kelesi kúni jeke kásipker retinde tirkeýdi Memlekettik kirister komıtetiniń www.kgd.gov.kz saıtynda tekserýge bolady.
