Jeke kásipkerlik úshin qandaı salyq rejımin tańdaýǵa bolady
Salyq kodeksinde salyqtyń jekelegen túrlerin, jeńildik stavkalaryn jáne salyq aýyrtpalyǵyn tómendetýge baǵyttalǵan basqa tetikterdi esepteý men tóleýdiń ońaılatylǵan tártibi belgilengen shaǵyn kásipkerlik sýbektileri úshin arnaıy salyq rejımderi (ShOB úshin ASR) qarastyrylǵan.
Shaǵyn kásipkerlik sýbektileri úshin arnaıy salyq rejımderin birqatar qyzmet túrlerimen aınalysatyn kásipkerler qoldana almaıdy (aktsızdeletin taýarlardy óndirý, saqtaý jáne kóterme satý, benzın, dızel otyny men mazýtty satý, lotereıalar ótkizý, jer qoınaýyn paıdalaný, shynydan jasalǵan ydystardy jınaý jáne qabyldaý, tústi jáne qara metaldyń synyqtary men qaldyqtaryn saqtaý, óńdeý jáne satý, konsýltatsııalyq qyzmetter, býhgalterlik esep nemese aýdıt, qarjylyq, saqtandyrý qyzmeti jáne t.b.).
Qazaqstanda ShOB úshin kelesi arnaıy salyq rejımderiniń túrleri bar:
- patent negizinde ASR;
- ońaılatylǵan deklaratsııa negizindegi ASR;
- tirkelgen shegerimdi qoldaný negizindegi ASR.
Odan bólek, pandemııadan neǵurlym zardap shekken salalarda jumys isteıtin kásipkerler úshin bólshek salyq arnaıy salyq rejımi engizilgen, ol kásipkerliktiń shaǵyn jáne orta kásipkerlik sýbektilerine arnalǵan.
Osylardyń árqaısysyna jeke-jeke toqtala keteıik.
Patent negizindegi arnaıy salyq rejımi
Mindetti sharttary:
- jaldamaly jumysshylardyń eńbegi paıdalanylmaıdy;
- bir jyldaǵy kiris AEK-tiń 3 528-eselengen mólsherinen aspaıdy.
Patentti joǵaryda atalǵan sharttardy oryndaýmen qatar, jeke kásipkerlik túrindegi qyzmetti júzege asyratyn, sondaı-aq qyzmettiń 32 túriniń (taksı qyzmeti, jalǵa berý jáne t.b.) bireýin nemese birnesheýin júzege asyratyn jeke kásipkerler qoldanýǵa quqyly.
Jeke tabys salyǵynyń stavkasy salyq kezeńinde alynǵan kiriske 1% mólsherinde qoldanylady. Salyq eseptiligin bir aıdan bir jylǵa deıin kezeńge usyný múmkindigi qarastyrylǵan. Kóbinese bul rejımdi qyzmet kórsetý, múlikti jalǵa berý salasynda jumys isteıtin salyq tóleýshiler qoldanady.
Ońaılatylǵan deklaratsııa negizindegi arnaıy salyq rejımi
Mindetti sharttar:
- jarty jyldaǵy qyzmetkerlerdiń ortasha sany 30 adamnan aspaıdy;
- jarty jyldaǵy tabys AEK-tiń 24 038-eselengen mólsherinen aspaıdy.
Jeke tabys salyǵynyń stavkasy kiristiń 3% quraıdy (shyǵyndar eskerilmeıdi). Shyǵystardy shegermegende kirister salyq salý obektisi bolyp sanalady.
Salyq eseptiligi jarty jylda bir ret usynylady. Ońaılatylǵan deklaratsııa bıýdjetke tólenýge jatatyn jeke tabys salyǵynyń somalaryn kórsetedi, sondaı-aq jeke kásipker úshin de, jumyskerler úshin de tólem kózinen ustalatyn jeke tabys salyǵy, áleýmettik tólemder kórsetiledi.
Rejımdi negizinen saýda, qoǵamdyq tamaqtaný salasynda qyzmet etetin jáne basqa qyzmet túrlerin usynatyn salyq tóleýshiler paıdalanady.
Odan basqa, kiriske úsh komponentti ıntegratsııalanǵan júıeni mindetti túrde qoldana otyryp, jeke kásipker qolma-qol aqshasyz esep aıyrysý arqyly alǵan kiristerdiń 70 048-eselengen AEK shegindegi mólsheri kirmeıdi.
Tirkelgen shegerimdi paıdalana otyryp qoldanylatyn arnaıy salyq rejımi
Mindetti sharttar:
- jylyna jumyskerlerdiń ortasha sany 50 adamnan aspaıdy;
- bir jyldaǵy kiris 144 184-eselengen AEK-ten aspaıdy.
Jyldyq jıyntyq tabystyń 30% mólsherinde rastaıtyn qujattarsyz (belgili bir sharttardy eskere otyryp) qosymsha tirkelgen shegerim beriledi. Sondaı-aq, eńbekaqy shyǵyndary boıynsha beriletin shegerimnen bólek, salyq salynatyn tabysty eńbekaqy tóleý qorynan 100% qosymsha kemitý qarastyrylǵan.
Rejımdi negizinen kóterme jáne bólshek saýda qyzmetin júzege asyratyn, basqa qyzmet túrlerin kórsetetin, sondaı-aq qurylys salasynda jumys isteıtin salyq tóleýshiler qoldanady.
Bólshek salyq arnaıy salyq rejımi
Bólshek salyq arnaıy salyq rejımin Qazaqstan Respýblıkasynyń Kásipkerlik kodeksine sáıkes shaǵyn jáne orta bıznes sýbektileri dep tanylǵan jáne Qazaqstan Respýblıkasy Úkimetimen aıqyndalǵan tek bir nemese birneshe qyzmet túrlerin júzege asyratyn salyq tóleýshiler qoldana alady. (QR Úkimetiniń 02.02.2021 j. №30 Qaýlysy).
Jeke tabys salyǵynyń stavkasy 3% quraıdy. Salyq kezeńi - kúntizbelik toqsan.
Bul rejımdi 2021 jyldyń 1 qańtarynan bastap 2 jyl qoldanýǵa bolady.
Biryńǵaı jeńildikti stavkamen jáne QQS pen áleýmettik salyqtan bosatatyn bólshek salyq rejımin engizý bul pandemııadan neǵurlym kóp zardap shekken ekonomıka salalarynda jumys isteıtin kásipkerlik sýbektilerin qoldaýdyń ýaqytsha jáne qajetti sharasy bolyp otyr. Ol kásipkerlerdiń salyq salýyn aıtarlyqtaı jeńildetýge múmkindik beredi.
