Jeke kásipkerlik sýbektilerin qarjylyq saýyqtyrý máselesi boıynsha memorandýmǵa qol qoıyldy
ASTANA. Mamyrdyń 26-sy. QazAqparat /Rýslan Ǵabbasov/ - Búgin Astanada QR Qarjy mınıstrligi Dármensiz boryshkerlermen jumys jasaý komıteti men «Atameken odaǵy» Qazaqstannyń ulttyq ekonomıkalyq palatasy jeke kásipkerlik sýbektilerin qarjylyq saýyqtyrý máselesi boıynsha yntymaqtastyq týraly memorandýmǵa qol qoıdy,
dep habarlaıdy QazAqparat.
Atalǵan qujatty QR Qarjy mınıstrligi Dármensiz boryshkerlermen jumys jasaý komıtetiniń tóraıymy Nurıla Úsenova men «Atameken odaǵy» Qazaqstannyń ulttyq ekonomıkalyq palatasynyń tóraǵasy Azat Perýashev bekitti.
«Bıznes sýbektilerimen baılanystardy jasaý kerek. Bul birlesip tıisti jumystardy atqarýǵa, zańnamalyq jáne tájirıbelik kemshilikterdi anyqtaýǵa múmkindik beredi»,-dedi N. Úsenova.
«Qarjylyq saýyǵýdy qajet etetin kásiporyndar bar. Sondyqtan atalǵan kásiporyndardyń aıaǵynan turyp ketýi jumys oryndary men salyq salý bazasyn saqtap qalýǵa múmkindik beredi. Osyǵan baılanysty kásiporyndar ózderiniń tólempazdyǵyn qalpyna keltirýine, Keden odaǵy aıasynda básekege qabiletti bolýyna biz múddelimiz»,- dedi komıtet tóraıymy.
Atap aıtqanda, qujatqa qol qoıǵan taraptar halyqaralyq tájirıbeni eskere otyryp, bankrot salasynda qoldanystaǵy zańnamany jetildirýge jáne kásiporyndardyń qarjylyq saýyǵýy men kredıtorlar múddelerin qorǵaýdy qamtamasyz etýde kásipkerlik sýbektilerge kómek kórsetý boıynsha tıisti jumystardy júrgizýge kelisti. Bekitilgen memorandýmda qarjylyq saýyǵý boıynsha sharalar turǵysynda kásipkerlik sýbektileriniń aqparattandyrý dárejesin arttyrý boıynsha qadamdar qarastyrylǵan.
