Jeke detektıvterdiń qyzmeti zańnamalyq turǵyda rettelmek
ASTANA. KAZINFORM — Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen Kásipkerlik qyzmetti retteý máseleleri jónindegi vedomstvoaralyq komıssııanyń otyrysy ótti, dep habarlaıdy Premer-mınıstrdiń baspasóz qyzmeti.
Otyrysqa memlekettik organdardyń, «Atameken» ulttyq kásipkerler palatasynyń jáne salalyq birlestikterdiń ókilderi, sondaı-aq QR Parlamenti Májilisiniń depýtaty Bolatbek Nájimetdınuly qatysty.
Kún tártibindegi negizgi máselelerdiń biri — jeke detektıvtik qyzmet salasyndaǵy retteýshilik áserdi taldaý. Іshki ister mınıstrligi jeke detektıvterdi lıtsenzııalaýdy, olardyń jumys ornyna qoıylatyn talapty belgileýdi, sondaı-aq kásibı jaýapkershilikti mindetti saqtandyrýdy kózdeıtin retteýshi quraldardy engizýdi usyndy.
— Qazir jeke detektıvterdiń qyzmeti, sonyń ishinde joǵalǵan adamdardy izdeý, baqylaý, azamattyq, ákimshilik is boıynsha dáleldeme jınaý is júzinde zańnamalyq jaǵynan rettelmegen. Usynylyp otyrǵan sharalar azamattardyń quqyǵyn qorǵaýǵa, bilikti mamandardyń qyzmet kórsetýin qamtamasyz etýge, sondaı-aq memlekettik qupııa jáne jeke ómirge qol suqpaý talabyn saqtaýǵa baǵyttalǵan. Bul máseleler boıynsha retteýshilik áserdi talqylaý ótken jylǵy 27 qarasha — 2 jeltoqsanda ashyq normatıvtik quqyqtyq aktiler portalynda ótkizilgen. Oǵan jurtshylyqtan eskertýler túsken joq, — delingen habarlamada.
Іshki ister mınıstriniń orynbasary Sanjar Ádilov jeke detektıvterdiń kásibı jaýapkershiligin lıtsenzııalaý men saqtandyrý azamattardyń jeke ómirine aralasý táýekelin azaıtý, osy sala qyzmetiniń ashyqtyǵyn arttyrý úshin qajetti shart ekenin atap ótti. Onyń aıtýynsha, jeke sot oryndaýshylar ınstıtýtymen uqsastyǵy boıynsha bul sharalar azamattardyń múddesin qorǵaýǵa baǵyttalǵan órkenıetti detektıvtik qyzmet naryǵyn qalyptastyrýǵa yqpal etedi.
Sondaı-aq munaı bazalary ıeleriniń rezervýarlardy esepke alatyn baqylaý quraldarymen (EBQ) jaraqtandyrý jónindegi mindetine qatysty retteýshilik áserdi taldaýdyń nátıjesi qaraldy. Energetıka vıtse-mınıstri Sanjar Járkeshov elimizdegi munaı ónimderiniń aınalymyn kezeń-kezeńimen tsıfrlandyrý barysy týraly habarlady. Osy jumys sheńberinde zańnamada munaı óńdeý zaýyttary men avtojanarmaı quıý stansalaryn esepke alatyn baqylaý quraldarymen jaraqtandyrý mindettelgen.
— Bul rette qoldanystaǵy normada EBQ qoldanylmasa, munaı ónimin ótkizý jáne tıep jóneltý úshin jaýapkershilik belgilengeni, al otyndy saqtaý jáne ótkizý kezinde olardyń munaı bazasynda bolmaýy úshin jaýapkershilik bekitilmegeni atap ótildi. Osyǵan baılanysty munaı bazasy ıeleriniń esepke alatyn baqylaý quraldaryn ornatý jáne paıdalanǵaný máselesi boıynsha jaýapkershilik belgileý usynylady, — delingen habarlamada.
EBQ munaı óniminiń túsýi men jiberilýin, otyn qaldyǵyn, JJM qozǵalysyn naqty ýaqyt rejıminde avtomatty esepke alady. Qazir munaı bazalary kóp jaǵdaıda biryńǵaı tsıfrlyq esepke alý júıesinen tys qalyp otyr. Bul esepke alynbaǵan munaı ónimi aınalymy qaýpin týǵyzady.
Munaı bazalaryn EBQ mindetti jaraqtandyrýynyń bolmaýy JJM naryǵynyń kóleńkeli tustaryn, sur aımaqtardy qalyptastyryp, salyq túsiminiń alynbaýyna, ásirese kórshi eldermen 40-60% deńgeıinde saqtalyp otyrǵan baǵa dısparıtetine yqpal etetini atap ótildi. Esepke alatyn baqylaý quraldaryn engizý munaı ónimi aınalymynyń barlyq tizbegin jiti baqylaýdy qamtamasyz etýge, memlekettik baqylaýdyń tıimdiligin arttyrýǵa jáne naryqtaǵy barlyq qatysýshy úshin teń jaǵdaı jasaýǵa múmkindik beredi.
Otyrystyń qorytyndysynda Vedomstvoaralyq komıssııa qaralǵan máseleler boıynsha retteýshilik áserdi taldaý nátıjelerin maquldady.
Budan buryn Prezıdent tapsyrmalaryn júzege asyrý aıasynda Premer-mınıstr Oljas Bektenovtiń tóraǵalyǵymen Alataý qalasyn damytý jónindegi keńestiń otyrysy ótkenin jazǵan bolatynbyz.