Jeke derekterińiz ben qarjyńyzdy kıberalaıaqtardan qalaı qorǵaýǵa bolady
ASTANA. KAZINFORM — Eń kóp taralǵan kıberqaýipter qatarynda fıshıngtik shabýyldar, zalal keltiretin baǵdarlamalyq qamtamasyz etý, qupııasózderdi irikteý jáne ártúrli alaıaqtyq shemalar.
Qarjy naryǵyn retteý jáne damytý agenttigi azamattarǵa jeke derekter men qarjylyq aqparatty qorǵaý úshin tsıfrlyq qaýipsizdik qaǵıdalaryn saqtaý qajettigin eske salady.
Eń kóp taralǵan kıberqaýipter qatarynda fıshıngtik shabýyldar, zalal keltiretin baǵdarlamalyq qamtamasyz etý, qupııasózderdi irikteý jáne ártúrli alaıaqtyq shemalar bolyp qala beredi. Erekshe qaýip tóndiretini — jasandy ıntellekt tehnologııalary. Qaskóıler olardy shynaıy kórinetin fıshıngtik habarlamalardy, sondaı-aq dıpfeıkterdi — jalǵan daýystyq jáne beınejazbalardy jasaý úshin paıdalanady.
Kıberqaýipterden qorǵaný úshin mynadaı qarapaıym qaǵıdalardy saqtaý usynylady:
- bógde adamdarǵa jeke derekterińizdi jáne qujattaryńyzdyń kóshirmelerin bermeńiz;
- qujattardyń, bank kartalarynyń jáne ózge de qupııa derekterdiń fotosýretterin ashyq qoljetimdilikke jarııalamańyz;
- jeke nemese qarjylyq aqparatty qamtıtyn qujattardy senimdiligi rastalmaǵan jasandy ıntellekt servısterine júktemeńiz.
Eseptik jazbalaryńyzdy qorǵańyz:
- kúrdeli ári biregeı qupııasózderdi paıdalanyńyz;
- eki faktorly aýtentıfıkatsııany qosyńyz;
- qupııasózderdi, SMS-kodtardy jáne rastaý kodtaryn eshkimge habarlamańyz.
Qońyraýlar men habarlamalarǵa muqııat bolyńyz:
- aqshany shuǵyl aýdarýdy nemese qupııa aqparatty habarlaýdy suraıtyn ótinishterge senbeńiz;
- beıtanys adamdardyń ótinishi boıynsha qandaı da bir baǵdarlamalardy ornatpańyz;
- kúmándi qońyraýlar túsken jaǵdaıda uıymmen onyń resmı baılanys arnalary arqyly ózińiz habarlasyńyz;
- qurylǵylaryńyzdyń jáne banktik servısterdiń qaýipsizdigin turaqty túrde baqylap, qosylǵan qoldanbalardy jáne operatsııalar boıynsha habarlamalardy tekserip otyryńyz.
Jeke derekterińizdiń jarııa bolyp ketý qaýpi týyndaǵan jaǵdaıda, qupııasózderińizdi dereý ózgertińiz, bank kartańyzdy nemese qashyqtan banktik qyzmetterge qoljetimdilikti buǵattańyz, bankke habarlańyz jáne qajet bolǵan jaǵdaıda quqyq qorǵaý organdaryna júginińiz.
Memlekettik organdardyń, bankterdiń jáne ózge de qarjy uıymdarynyń qyzmetkerleri telefon arqyly bank kartasynyń derektemelerin, rastaý kodtaryn, qupııasózderdi jáne ózge de qupııa aqparatty suratpaıdy.
Osy qarapaıym qaǵıdalardy saqtaý jeke derekterińiz ben aqsha qarajatyńyzdy joǵaltý táýekelin edáýir azaıtýǵa kómektesedi.
Aıta ketelik Qazaqstan men TMD elderi azamattarynyń jeke derekterin taratqan halyqaralyq arna joıylǵan edi.
