Jeke derekterdiń tarap ketýi: Qazaqtelekom men EırAstana jaýapqa tartyldy
ASTANA. KAZINFORM – Tsıfrlyq damý mınıstrligi aqpan aıyndaǵy qazaqstandyqtardyń jeke derekteriniń tarap ketýine qatysty aýdıt nátıjesin jarııalady.
Buryn habarlanǵandaı, 2024 jyldyń 16 aqpanynda qazaqstandyqtardyń 2019-2022 jyldardaǵy jeke derekterin belgisiz bireýler GitHub resýrsynda hakerler toptarynyń biriniń materıaldaryn jarııalady.
«Jarııalanǵan aqparatta qazaqstandyq baılanys operatorlarynyń abonentteri týraly resmı aqparattary bar, sonymen qatar «Qazaqtelekom» AQ, «Biryńǵaı jınaqtaýshy zeınetaqy qory» AQ, «Eır Astana» AQ ataldy. Mınıstrlik Ulttyq qaýipsizdik komıtetimen jáne «Memlekettik tehnıkalyq qyzmet» AQ-men birlesip ınfraqurylymynda jańa ymyraǵa kelý faktileri anyqtalmaǵan uıaly baılanys operatorlarynyń aqparattyq qaýipsizdiginiń jaı-kúıine taldaý júrgizdi. Búginde kompanııalardy otandyq aqparattyq qaýipsizdik operatsııalyq ortalyqtary qorǵaıdy», - delingen habarlamada.
Málim bolǵandaı, mınıstrlik buǵan qosa «Qazaqtelekom» AQ, «Biryńǵaı jınaqtaýshy zeınetaqy qory» AQ, «Eır Astana» AQ-ǵa qatysty aqparattyq qaýipsizdik talaptaryn saqtaý boıynsha jospardan tys tekserýler júrgizgen.
Nátıjesinde 2 zańdy tulǵa («Qazaqtelekom» AQ, «EırAstana» AQ) Qazaqstan Respýblıkasynyń «Ákimshilik quqyq buzýshylyq týraly» Kodeksi 641-babynyń 1-bóligi 2-tarmaǵymen ákimshilik jaýapkershilikke tartylyp, zań buzýshylyqtardy joıý úshin bir jyl merzimge nusqama berildi. «BJZQ» AQ boıynsha zań buzýshylyqtar anyqtalǵan joq.
Qazirgi ýaqytta atalǵan uıymdardyń aqparattyq-kommýnıkatsııalyq ınfraqurylymy aqparattyq qaýipsizdik ıntsıdentterin anyqtaý jáne boldyrmaý maqsatynda táýlik boıy monıtorıngte turǵanyn atap ótken jón.
Eske sala keteıik, buǵan deıin qazaqstandyqtardyń eki mıllıonnan astam jeke deregi tarap ketkeni týraly jazǵan bolatynbyz.
