Jeke derekterdiń taralýyna qatysty tekserý júrgizilip jatyr

ASTANA.KAZINFORM — Áleýmettik jelilerde Qazaqstan azamattarynyń jeke derekteri tarady degen aqparatqa baılanysty Tsıfrlyq damý, ınnovatsııalar jáne aeroǵarysh ónerkásibi mınıstrligi (TsDIAÓM) resmı málimdeme jasady. 

Mınıstrliktiń habarlaýynsha, TsDIAÓM Aqparattyq qaýipsizdik komıteti quqyq qorǵaý jáne arnaıy organdarmen birlesip, usynylǵan aqparattyń shynaıylyǵy men ózektiligin anyqtaý maqsatynda keshendi tekserý júrgizip jatyr.

— Alǵashqy taldaý bul derekterdiń memlekettik emes, ıaǵnı jekemenshik aqparattyq júıelerden alynýy múmkin ekenin kórsetti. Qazirgi tańda memlekettik aqparattyq júıelerge jasalǵan kıbershabýyl nemese derekterdiń taralý faktileri tirkelgen joq, — delingen vedomstvo habarlamasynda.

Mınıstrlik tekserý tolyq aıaqtalǵanǵa deıin qandaı da bir qorytyndy jasaýǵa erte ekenin eskertti. Sonymen qatar azamattardyń derbes derekteri taralǵan jaǵdaıda, bul týraly eGov portaly arqyly jeke kabınetterine habarlama joldanady.

— Buǵan deıin de osyndaı jaǵdaılarda jarııalanǵan málimetter eski aqparattyq bazalardan — negizinen qyzmet kórsetý salalary men mıkroqarjy uıymdarynan alynǵan bolatyn, — dep naqtylady mınıstrlik.

TsDIAÓM bul jaǵdaıdy baqylaýda ustap otyr jáne qosymsha aqparat tekserý nátıjeleri boıynsha jarııalanatynyn málimdedi.

Eske sala keteıik, jeke derekterdiń qorǵalýy men alaıaqtyqqa qarsy is-qımyl týraly jazǵanbyz.