Jeke derekterdiń taralǵanyn qalaı tekserýge bolady
ASTANA. KAZINFORM – Qazaqstandyqtar jeke derekteriniń ınternetke taralǵan-taralmaǵanyn tegin teksere alady. Bul týraly Ortalyq kommýnıkatsııalar qyzmetinde ótken brıfıngte QR Jasandy ıntellekt jáne tsıfrlyq damý vıtse-mınıstri Dosjan Musalıev aıtty.
Onyń aıtýynsha, kıberalaıaqtyqpen kúreste zańnamalyq jáne tehnıkalyq tetiktermen qatar azamattardyń tsıfrlyq saýatyn arttyrý da mańyzdy. Osy maqsatta memleket birneshe tegin tsıfrlyq servıs pen bilim berý platformasyn iske qosqan.
– NomadGuard platformasy arqyly azamattar jeke derekteriniń ınternetke taralǵan-taralmaǵanyn tekserip, fıshıngtik siltemelerdi anyqtaı alady. Sonymen qatar eGov Mobile qosymshasyndaǵy «Stop-kredıt» servısi óz atyna nesıe rásimdeýge erikti túrde tyıym salýǵa múmkindik beredi. Al derbes derekterge qoljetimdilikti baqylaý servısi jeke málimetterdi óńdeýge qaı uıymdarǵa kelisim berilgenin kórýge jáne qajet bolǵan jaǵdaıda ony keri qaıtaryp alýǵa jaǵdaı jasaıdy, – dedi Dosjan Musalıev.
Vıtse-mınıstrdiń sózinshe, kıbermádenıetti qalyptastyrý úshin tegin bilim berý resýrstary da qoljetimdi. Atap aıtqanda, UNICEF uıymymen birlesip ázirlengen eGov platformasyndaǵy onlaın kýrs balalar men ata-analarǵa kıberbýllıngten qorǵaný, onlaın-grýmıngtiń aldyn alý, derbes derekterdi qorǵaý jáne ınternetti qaýipsiz paıdalaný joldaryn úıretedi.
Budan bólek, CitizenSec platformasynda azamattar men memlekettik qyzmetshilerge arnalǵan kıbergıgıena negizderi boıynsha tegin oqý kýrstary bar.
Eske salaıyq, buǵan deıin Úkimet kıberqaýipsizdikti qamtamasyz etý qaǵıdalaryn jańartyp, tsıfrlyq ınfraqurylymdy qorǵaý talaptaryn kúsheıtken bolatyn.
