Jeke derekterdi jarııa etpeńiz: ІІM eskertý jasady
ASTANA. KAZINFORM — Sońǵy ýaqytta ınternet jáne mobıldik alaıaqtyq jaǵdaılary jıilep ketti. Osyǵan baılanysty ishki ister organdary azamattarǵa kıberqaýipsizdik talaptaryn qatań saqtaýdy eskertedi.
Polıtsııa taratqan málimetke sáıkes, alaıaqtar kóbine adamdardyń senimine kirip, jeke málimetterin alýdyń túrli aıla-tásilderin qoldanady.
Tómende kıberalaıaqtyqtan saqtanýǵa kómektesetin keńester berilgen:
- SMS arqyly kelgen kodtardy, bank kartasynyń CVV jáne PIN-kodyn, onlaın-bankıng logıni men parolin eshkimge jarııa etpeńiz;
- Belgisiz nemese kúmándi siltemelerge ótpeńiz;
- Beıtanys nómirlerden qońyraý tússe, olarǵa qaıta habarlasýdan aýlaq bolyńyz;
- Bank, «Qazposhta» jáne ózge de resmı uıymdar eshqashan telefon arqyly aqsha aýdarýdy nemese jeke derekterdi suramaıdy;
- Eger sizge aıtylǵan aqparat kúdik týdyrsa, áńgimeni dereý toqtatyp, uıymnyń resmı baılanys ortalyǵyna habarlasyńyz.
- Eger siz alaıaqtardyń arbaýyna túsip qalsańyz nemese osyndaı áreketke tap bolsańyz, dereý polıtsııaǵa nemese «102» nómirine habarlasyńyz, - delingen aqparatta.
Quqyq qorǵaý organdary kıberqaýipsizdikke jaýapkershilikpen qaraýǵa jáne bógde adamdarǵa jeke málimetterdi bermeýge shaqyrady.
Aıta keteıik, Atyraýda jyl basynan beri kıberqylmysqa baılanysty 50-ge jýyq kúdikti ustaldy.