Jeke derekter taralyp ketkennen keıin qazaqstandyqtar JSN-in qaıta jasatýy qajet pe

ASTANA. KAZINFORM — «Qazaqstan turǵyndary 2024» ataýymen tirkelgen jańa aýqymdy derekqor ınternet keńistigine tarap ketkeni belgili. Osyǵan baılanysty azamattar JSN-derin qaıta jasatyp, málimetterin jańartýy qajet pe? Bul saýalǵa Ádilet vıtse-mınıstri Bekbolat Moldabekov jaýap berdi.

— JSN-di qaıta jasatýdyń esh máni joq. Óıtkeni, bul sáıkestendirý nómiri. Kredıt pen alaıaqtarǵa keler bolsaq, bul baǵytta áriptesterimizben birge jumys istedik. Egov-ta «stop-kredıt» qyzmeti bar. Onda siz ózińizdi atalǵan tizilimge tirkeı alasyz jáne eshkim atyńyzdan nesıe rásimdeı almaıdy. Ózińiz ǵana ruqat bergende ǵana rásimdeledi. Sondyqtan bári de qorǵalǵan, — dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, alaıaqtyq táýekelderin tómendetý úshin qaýipsizdiktiń belgili bir erejelerin saqtaý asa mańyzdy.

— Eshkimge senbeý, qosymsha keletin sms-kodty eshkimge aıtpaý asa mańyzdy. Sms-kodty memlekettik qyzmetter alǵan kezde ǵana kórsete alasyz. Ózińizdi qorǵaý mańyzdy. 1414 nómirinen kelgen sms-kodty eshkimge jibermeý kerek. Eń durysy qorǵaný jáne «stop-kredıt» qyzmetin padalaný, — dedi vıtse-mınıstr.

Buǵan deıin qazaqstandyqtardyń jeke derekter qaıdan tarap ketkeni jóninde joramal aıtylǵan edi.

Sonymen qatar jeke derekterdiń taralýyna qatysty tekserý júrgizilip jatyr. Sondaı-aq Roman Sklıar qazaqstandyqtardyń jeke derekteriniń urlanýy týraly pikir bildirgen bolatyn.