Jeke derekter qaıdan tarap ketkeni jóninde joramal aıtyldy
ASTANA. KAZINFORM — Qazaqstanda «Qazaqstan turǵyndary 2024» ataýymen tirkelgen jańa aýqymdy derekqordyń ınternet keńistigine taraǵany anyqtaldy. Bul týraly TSARKA Group vıtse-prezıdenti Eńlik Satıeva málimdedi.
Onyń aıtýynsha, qazirgi ýaqytta ashyq qoljetimdilikke 16 302 107 jazba shyqqan. Bul san elimizdiń jalpy halqynyń basym bóligin qamtıdy.
— Bul jaı ǵana adamdardyń aty-jóni emes. Jarııalanǵan bazada azamattardyń asa mańyzdy derbes málimetteri bar. Atap aıtqanda, tegi, aty, ákesiniń aty, jynysy, týǵan kúni, JSN, azamattyǵy, ulty, turǵylyqty mekenjaıy, tirkelý jáne turý merzimi, sondaı-aq uıaly, úı jáne jumys telefondary kórsetilgen, — dep jaýap berdi Eńlik Satıeva agenttik tilshisine.
Onyń sózinshe, keıbir málimetter medıtsınalyq uıymdardan, atap aıtqanda, emhanalar men stomatologııalyq mekemelerden alynǵan bolýy múmkin. Bul baza naqty bir uıymnan taraýy da múmkin nemese birneshe aqparat kózinen jınaqtalǵan aqparat bolýy yqtımal. Bul derekterdi JSN-di biriktirý arqyly tolyqtyrylǵan bolýy múmkin. Ázirge derekkóz naqty anyqtalǵan joq. Tekserý jumystary jalǵasyp jatyr.
Sonymen qatar jeke derekterdiń yqtımal taralýyna baılanysty azamattarǵa resmı habarlama jiberilgennen keıin, qandaı málimetterdiń naqty komprometatsııalanǵanyn Egov mobile qosymshasyndaǵy Nomad Guard servısinen kórýge bolady. Bul týraly Nomad Guard jobasynyń jetekshisi Rýslan Týrgýldınov málimdedi.
— Qazirgi ýaqytta atalǵan baza servıste kórsetilmeıdi. Tek resmı túrde push-habarlama nemese SMS taraǵannan keıin ǵana azamattar óz derekterine qatysty aqparatpen tanysa alady. Bul azamattardyń derbes málimetterin qorǵaý jáne jalǵan alaıaqtyq áreketterden saqtandyrý úshin qajet, — dedi joba jetekshisi.
Onyń aıtýynsha, Nomad Guard — paıdalanýshylarǵa jeke derekteriniń qaýipsizdigin baqylaýǵa múmkindik beretin arnaıy servıs. Júıe azamattarǵa olardyń málimetteri tarap ketken jaǵdaıda der kezinde habar beredi.
Eske sala keteıik, buǵan deıin Tsıfrlyq damý, ınnovatsııalar jáne aeroǵarysh ónerkásibi mınıstrligi men Aqparattyq qaýipsizdik komıteti tarapynan tekseris bastalǵany týraly habarladyq.