Jeke basty kýálandyratyn qujattardyń ýaqytyly daıyn bolmaýy - óndiristik qýattardyń jetispeýshiliginen - Ádilet mınıstri
ASTANA. Tamyzdyń 31-i. QazAqparat /Gúlmıra Álıakparova/ - Jeke basty kýálandyratyn qujattardy ázirleý boıynsha óndiristik qýattardyń jetispeýshiligi saldarynan jas jubaılar zańdy neke qııý rásimin keıinge qaldyrýǵa májbúr boldy.
QR Ádilet mınıstri Rashıd Túsipbekovtyń jeke blogyna Qaraǵandy oblysy Shahtınsk qalasynyń turǵyny, 1985 jyly týǵan Sergeı Sýsoev hat jazyp, kómek suraǵan. «Men aldaǵy qyrkúıektiń 25-i kúni qalyńdyǵymmen zańdy nekege turýdy sheshtim. Shildeniń 25-i kúni jasym 25-ke tolǵandyqtan jeke kýáligimdi aýystyrýǵa májbúr boldym. Kýálikti jyldam merzimde daıyndaý úshin qosymsha qarajat tóledim. Sóıtip, qujatty qolyma tamyzdyń 19-y kúni alýym kerek bolatyn. Biraq búgin tamyzdyń 23-i boldy, qujat áli daıyn emes. Al erteń, AHAJ-ǵa ótinishimizdi beretin sońǵy kún. Jeke kýáligim bolmaǵandyqtan bizdi tirkeýge almaı otyr. Búgin Halyqqa qyzmet kórsetý ortalyǵynda boldym. Biraq olardan: «bul sizdiń problemańyz!», degennen basqa jaýap almadym. Bul tuıyq sheńberden shyǵýdyń joly bar ma?», delingen hatta.
Óz kezeginde Ádilet mınıstri, jeke basty kýálandyratyn qujattardy ázirleý boıynsha óndiristik qýattardyń jetispeýshiligi saldarynan, azamattyń atyna daıyndalǵan jeke kýálik qyrkúıektiń 2-si kúni beriletindigi týraly jaýap qaıyrdy.
Osy sekildi túıitkilge tap bolǵan Shyǵys Qazaqstan oblysynyń týmasy Alına Smaılova, tólqujatynyń ýaqytyly ázirlenbeýi saldarynan Máskeý qalasyna satyp alynǵan bıletin qaıyra ótkizip, saparyn keıinge qaldyrýǵa májbúr bolǵan. Ol tólqujat 15 kúnniń ishinde daıyn bolýy úshin qosymsha baj salyqtaryn tóleı otyryp, bir jarym aı ótse-daǵy tıisti qujatyn áli kúnge deıin ala almaı júrgenin aıtady.
«Bul qujat maǵan óte qajet. Sebebi men Máskeýdiń Bolat jáne qorytpalar ınstıtýty magıstratýrasynyń kúndizgi bólimine oqýǵa tústim. Aldyn ala baryp tirkeýden ótpesem, men oqýdan shyǵarylamyn. Qazir bıletti qaıta ótkizýge májbúrmin», dep jazady ol.
R.Túsipbekov: «Qoldaǵy bar aqparatqa sáıkes, sizdiń atyńyzǵa tólqujat tamyzdyń 26-sy kúni ázirlendi jáne ol berilý úshin ShQO boıynsha Ádilet departamentine joldandy», - dep jaýap qaıyra otyryp, qujat Astana qalasynan ShQO-ǵa jetkenshe qosymsha ýaqyt ketetindigi týraly eskertti.
