Jeke basty kýálandyratyn qujattar týraly zań jobasy Májiliske qaıtaryldy - Senat
ASTANA. 29 qarasha. QazAqparat - Búgin QR Parlamenti Senatynyń jalpy otyrysynda palata depýtattary «Jeke basty kýálandyratyn qujattar týraly» zań jobasyn talqylady.
Qujatqa birqatar túzetýler engizilgendikten zań jobasy Májiliske qaıtaryldy.
«Zań jobasynyń maqsaty - jeke basty kýálandyratyn qujatty rásimdeý, berý, aýystyrý, ótkizý, alyp qoıý jáne joıý talaptaryn belgileý», - dep atap ótti zań jobasy boıynsha baıandaǵan QR Іshki ister mınıstri Qalmuhambet Qasymov.
Onyń aıtýynsha, zań jobasy elimizdegi jeke basty kýálandyratyn qujattardyń quqyqtyq negizin aıqyndaýdy kózdeıdi. Sonymen qatar, zań jobasynda jeke basty kýálandyratyn sıpattaǵy qujatqa anyqtama biregeılendiriledi. Budan bólek, jeke basty kýálandyratyn qujattar túrleriniń tutastaı tizbeleri anyqtalady. Qujattandyrý salasyndaǵy ýákiletti memlekettik organnyń quzyreti aıqyndalady. Atap aıtqanda, zań jobasy boıynsha azamattyq quqyqtyq kelisimderdi jasaıtyn Qazaqstan azamatynyń tólqujaty men jeke kýáligi, sheteldiktiń turýǵa quqyq beretin jáne respýblıkada turaqty turatyn azamattyǵy joq azamattyń jeke kýáligi, sheteldik azamattyń shekaralyq tólqujaty sekildi qujattardyń tizimi aıqyndalyp otyr. Elimizdiń quzyrly oryndary bergen bul qujattar memlekettiń menshigi bolyp zań júzinde bekitilmek. Sonymen qatar, olardy berý jáne jaramsyz dep tanýdyń negizderi dáıekteldi.
Tólqujat pen jeke kýálikti daıyndaý merzimi 30 kúnnen aspaıtyn bolady.
Qujatty talqylaý barysynda senatorlar tarapynan birqatar túzetýler jasalǵan bolatyn. Olardyń basym bóligi redaktsııalyq naqtylaý sıpatynda bolyp otyr.
