Jeke basty kýálandyratyn qujattar týraly zań jobasy depýtattardyń talqysyna shyǵarylatyn boldy
ASTANA. 15 maýsym. QazAqparat - Búgin QR Parlamenti Májilisi Tóraǵasynyń orynbasary Sergeı Dıachenkonyń jetekshiligimen Palata Bıýrosynyń otyrysy ótti.
Onda aldaǵy aptada Májilistiń jalpy otyrysyna shyǵarylatyn máseleler sarapqa salyndy.
Úkimetten kelip túsken «Qazaqstan Respýblıkasynyń Úkimeti men Avstrııa Respýblıkasynyń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» zań jobasy boıynsha qorytyndy ázirleý máselesi qaraldy. Bul zań jobasy Halyqaralyq ister, qorǵanys jáne qaýipsizdik komıtetine jiberiledi.
Áleýmettik-mádenı damý komıteti«Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasymen jumysty jalǵastyrý jóninde usynys jasady.
Ekonomıkalyq reforma jáne óńirlik damý komıteti «Qazaqstan Respýblıkasynyń keıbir zańnamalyq aktilerine memlekettik monopolııa máseleleri boıynsha ózgerister men tolyqtyrýlar engizý týraly» zań jobasyna Parlament Senaty engizgen ózgerister men tolyqtyrýlardy talqyǵa salý máselesin jalpy otyrystyń kún tártibine usynyp otyr.
Sonymen qatar Zańnama jáne sot-quqyqtyq reforma komıtetiniń usynýymen «Jeke basty kýálandyratyn qujattar týraly» zań jobasy jáne soǵan ilespe zań jobasy birinshi oqylymda depýtattardyń talqysyna shyǵarylatyn boldy.Bul jóninde Májilistiń baspasóz qyzmetinen habarlady.
Bıýro otyrysynda depýtattyq korpýstyń zań shyǵarýshylyq qyzmetine qatysty basqa da máseleler qaraldy.
