«Jeke bas málimetteri jáne olardy qorǵaý týraly» QR Zańy bıylǵy qarasha aıynan bastap kúshine enedi - QR IJTM
ASTANA. 25 qazan. QazAqparat - «Jeke bas málimetteri jáne olardy qorǵaý týraly» QR Zańy bıylǵy qarasha aıynan bastap kúshine enedi. Bul týraly búgin Astanada «Qazaqstandaǵy aqparattyq qaýipsizdikti damytý» taqyrybynda ótken 2-shi halyqaralyq konferentsııada QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıteti tóraǵasynyń orynbasary Ǵalymjan Duǵalov aıtty.
«Qazaqstanda jeke bas jáne otbasy qupııalaryn saqtaýǵa, sondaı-aq osy saladaǵy memlekettik retteýdi kúsheıtýge arnalǵan «Jeke bas málimetteri jáne olardy qorǵaý týraly» Zań qabyldandy. Ol aǵymdaǵy jyldyń qarasha aıynan bastap kúshine enedi», - dedi ol.
Esterińizge sala keteıik, QR Parlamenti «Jeke bas málimetteri jáne olardy qorǵaý týraly» zań jobasyna engizilgen túzetýlerdi 2013 jyldyń sáýirinde qabyldaǵan bolatyn. Bul zań sýbekti, menshik ıesi, operator jáne jeke bas málimetterin jınaýmen, óńdeýmen jáne saqtaýmen aınalysatyn úshinshi tulǵanyń arasyndaǵy qarym-qatynastardy retteıdi. Sonymen qatar, sýbektiniń, menshik ıesiniń jáne operatordyń quqyqtary zańdyq turǵyda belgilengen edi.
Zań sondaı-aq jeke bas málimetterin óńdeý shartarynyń buzylǵanyna oraı jeke jáne laýazymdy tulǵalarǵa aıyppul retindegi ákimshilik jazany qoldanýdy qarastyrady. Zań jobasyn jasaýshylardyń pikirinshe, bireýdiń jeke bas málimetterin ruqsatsyz taratqany úshin ákimshilik jazaǵa tartý árbir azamattyń jeke, otbasylyq qupııalaryn jáne basqa da bıometrıkalyq málimetterin saqtaýǵa septigin tıgizedi.
