Jeke balabaqshalar ashqan kásipkerlerge tárbıelep jatqan ár balasy úshin memleket tarapynan 11 myń teńge tólenedi - J.Túımebaev
ASTANA. Sáýirdiń 6-sy. QazAqparat /Marlan Jıembaı/ - Jeke balabaqshalar ashqan kásipkerlerge, jeke tulǵalarǵa tárbıelep jatqan ár balasy úshin memleket tarapynan 11 myń teńge tólenedi. Bul týraly búgin L.Gýmılev atyndaǵy Eýrazııa ulttyq ýnıversıtetiniń stýdentterimen kezdesip, Elbasynyń bıylǵy «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýyn talqylaǵan Bilim jáne ǵylym mınıstri Janseıit Túımebaev aıtty.
Elimizdegi túıtkildi jaıttardyń biri 3 pen 6 jas aralyǵyndaǵy balalardy mektepke deıingi mekemelermen qamtý bolǵandyǵyn atap ótken mınıstrdiń sózine qaraǵanda, bul máseleni sheshýge baǵyttalǵan sharalar naqty qolǵa alynyp otyr. bul oraıda memleket tarapynan balabaqshalar kóptep salynbaq. Ekinshi kezekte jeke kásipkerlikke, jeke bızneske úlken qoldaý beriletin bolady. ıAǵnı jeke balabaqshalar, sondaı-aq shaǵyn ortalyqtardyń salynýyn qoldaý memleket tarapynan basty nazarǵa alynady.
«Budan keıingi kezeńde jeke balabaqshalardy ashqan bıznesmenderge, jeke tulǵalarǵa sol tárbıelep jatqan ár balasy úshin memleket tarapynan aısaıyn 11 myń teńge kóleminde qarjy bólinedi. Bul turǵyda bıyldan bastap bizge jeke balabaqshadaǵy tárbıeshilerdiń qatary, sol jerdegi qyzmetkerlerdiń sany da respýblıka boıynsha kóbirek kerek bolady. Osyǵan oraı biz joǵary oqý oryndaryna, kolledjderge tapsyrma berip, mektepke deıingi balalardyń tárbıeshilerin kóbeıtý úshin arnaıy memlekettik tapsyrys beremiz», dedi mınıstr óz sózinde.
Mınıstrdiń sózine qaraǵanda, elimizdegi balabaqshalar memlekettik, jeke, mektepterdiń qurmyndaǵy shaǵyn ortalyqtar retinde qyzmet istemek. Buǵan deıin elordada shaǵyn ortalyqtar ashý tájirıbesi qolǵa alynyp, kóp qabatty úılerdiń 1-2-shi qabattarynda osyndaı mekemeler óz jumystaryn bastap ta ketken bolatyn.
