Jeke avtoparkter barlyq problemany memleketke aýdara salady - Baýyrjan Baıbek
ALMATY. QazAqparat - Almaty ákimi Baýyrjan Baıbek qoǵamdyq kólik júrgizýshilerin oqytatyn Qazaqstandaǵy alǵashqy kólik mamandarynyń biliktiligi jónindegi ortalyqtyń jumysymen tanysty, dep habarlaıdy QazAqparat tilshisi.
Biliktilik jónindegi ortalyqta bolǵan Almaty ákimi avtoparkter basshylarynyń nazaryn kólikterdi modernızatsııalaýǵa, sapaly qyzmet pen qaýipsizdikke aýdardy.
«Jeke avtoparkter qojaıyndary barlyq problemany memleketke aýdara salyp, ózderiniń jyljymaly sostavtaryn jańartýǵa asyqpaıdy. Benzın men dızelge jaqsy baǵalar bolǵanda bıznes qaıda qarady? Olar osy ortadaǵy qarjyny ózge salalarǵa aýdardy, sondyqtan kóleńkeli jaıttarǵa ketken qalalyqtardyń aqshasyna sýbsıdııa bólmeımiz», - dedi B.Baıbek.
Jańa ortalyqta jalpy bilim beretin zamanaýı oqý aýdıtorııalary, emtıhan tapsyratyn kompıýterlik synyptar, trenajerli kabınetter, júrgizýshiniń psıhıkalyq saraptamasy men etıkasy boıynsha bólme bar, sonymen qatar mundaǵy mamandar júrgizýshilerge alǵashqy medıtsınalyq kómek kórsetý ádisterin de úıretedi.
Ortalyq dırektory Roza Badaeva «D» kategorııaly júrgizýshilerge 16 mamannyń dáris oqıtynyn aıtty. Eń bastysy, munda qalanyń negizgi tasymaldaýshylarymen kelisim jasalǵan.
Qalanyń Jumyspen qamtý jáne áleýmettik baǵdarlamalar basqarmasynyń basshysy Aıgúl Ahmetova ortalyqta bilimderin jetildirýge kólik aıdap júrgen júrgizýshilermen qatar syrttaı izdenýshilerdiń de qyzyǵýshylyq tanytyp otyrǵandyǵyn aıtty.
Jumyspen qamtý baǵdarlamasy boıynsha 300 adamdy oqytý josparlanǵan. Qazirgi kezde trolleıbýs júrgizetin 15 adam men avtobýs júrgizetin 15 maman bilimderin jetildirýde.
Atap óterlik jaıt, bıylǵy jyldyń jaz aılarynda da qala kóligin reformalaý (jańa jolaqtar, qolaıly jol bólikteri, birjaqty kóshe, t.b.) jumystary odan ári jalǵasady. Budan ózge, qalanyń avtobýs parki taýǵa júretin jańa 60 kólik birligimen tolyǵyp, 40 evakýator satyp alynady.
