Jeke aýdarym ba, álde kásip pe – Salyq organdary eki arany qalaı ajyratady
ASTANA. KAZINFORM — Elimizde mobıldi aýdarymdardy baqylaý júrgizýi barlyq azamattardyń jeke aýdarymdaryna júrmeıdi. Salyq organdary banktermen birlesip, tek kásipkerlik qyzmet belgileri bar shottardy anyqtaıtyn naqty ólshemsharttardy bekitken. Bul týraly BIZDIÑ ORTA podkastynda Óndiristik emes tólemderdi jáne jeke tolyqtyrýlardy ákimshilendirý departamentiniń dırektory Shyndalı Zańǵar túsindirip berdi.
Mobıldi aýdarymdar bastapqyda jeke tulǵalardyń bir-birine aqsha aýdarýy úshin jasalǵan yńǵaıly qural bolǵanymen, ýaqyt óte kele bıznes ókilderi ony tólem qabyldaý tásili retinde keńinen qoldana bastady. Bank kelisimsharttarynda jeke shottardy bıznes úshin paıdalanýǵa tyıym salynǵanymen, naryqta jıi kezdesip jatady.
Jeke aýdarymdar men kásipkerlik tabysty ajyratý úshin arnaıy fıltrler engizilgen.
— Ne úshin 100 aýdarym, ne úshin úsh aı, ne úshin 1 mıllıon 20 myń teńgeden asýy kerek? Bunyń bári kelisilgen jáne zerttelgen. 100 ártúrli adamnan úsh aı boıy qatarynan aı saıyn tólem túsip, somasy 1 mln 20 myń teńgeden assa, bul — jeke aýdarymnyń emes, bıznestiń beınesi. Barlyq aýdarymdar tekserilmeıdi. Qarapaıym azamattardyń kúndelikti aýdarymdaryna bul krıterıılerdiń qatysy joq, — dedi Shyndalı Zańǵar.
Spıker jańadan bastaǵan kásipkerler men shaǵyn bıznes ókilderi úshin memleket tarapynan óte yńǵaıly salyq rejımderi qarastyrylǵanyn atap ótti. Máselen «e-Salyq Business» mobıldi qosymshasy arqyly ózin-ózi qamtý rejımine ótýge bolady.
— Ózin-ózi qamtý rejıminde eshqandaı salyqtyq eseptilik tapsyrýdyń qajeti joq. Tek mobıldi qosymsha arqyly túbirtek beresiz. Salyq mólsheri tabystyń 4 paıyzyn ǵana quraıdy. Bul 4 paıyzdyń ózi memlekettik salyq emes, azamattyń óziniń zeınetaqy qoryna, áleýmettik jáne medıtsınalyq saqtandyrý qorlaryna aýdarylatyn tólemder. Al jeke kásipker bolyp tirkelse, salyq mólsheri 2-4 paıyz aralyǵynda bolady. Kerisinshe, salyqtan jaltaratyndar erteń anyqtalsa, 10 paıyz aıyppul salyǵyn tóleýge májbúr bolady, — dep eskertti Departament basshysy.
Sonymen qatar Shyndalı Zańǵar qolma-qol aqshaǵa qaıta ótý ýaqytsha ǵana qubylys ekenin aıtty. Tutynýshylar ózine yńǵaıly onlaın tólemderdi, QR-kodty talap etetindikten, bolashaqta tsıfrlyq tólemder úlesi báribir basym bolady. Al salyq organdary tsıfrlandyrý arqyly bıznesti baqylaýdy emes, oǵan qolaıly servıstik qyzmet kórsetýdi ary qaraı damyta bermek.
Aıta keteıik, buǵan deıin, ózin-ózi jumyspen qamtyǵandar úshin jeke salyq qarastyrylmaıtynyn jazǵan edik.
