Jeke ambıtsııalar emes, qoǵamdyq múdde kózdelýi kerek – Darhan Jazyqbaev stýdenttermen kezdesti

ASTANA. QazAqparat – Talantty jastar men kásibı mamandardy memlekettik qyzmetke tartý jáne olardy qoldaý sharalary. Memlekettik qyzmet isteri agenttiginiń tóraǵasy Darhan Jazyqbaev S. Seıfýllın atyndaǵy Qazaq agrotehnıkalyq ýnıversıteti stýdentterimen kezdesip, osy jáne basqa da máseleler tóńireginde oı bólisti, dep habarlaıdy QazAqparat Agenttiktiń baspasóz qyzmetine silteme jasap.

Memleket basshysynyń memlekettik qyzmetke kirýdegi artyq kedergilerdi joıý jáne odan «shyǵý» tártibin jeńildetý jónindegi tapsyrmasyn oryndaý maqsatynda zańnamaǵa tıisti ózgerister engizildi. Endi oqý ornyn memlekettik grantpen úzdik bitirgen, oqýda joǵary kórsetkishterge (GPA 3,33-den joǵary) jetken túlekter aýdandyq jáne aýyldyq jerlerdegi tómengi memlekettik laýazymdarǵa konkýrstyq irikteýsiz tikeleı taǵaıyndala alady.

«Bul – eń aldymen, jastar úshin jasalyp jatqan jeńildikter. Jas mamandardyń el óńirlerine oralyp, onyń damýyna úles qosýyna jol ashady. Memlekettik qyzmet mamandyq tańdamaıdy, onda ártúrli maman ókilderi qyzmet atqara alady», - dedi Darhan Jazyqbaev.

Ulttyq, salalyq jáne ózge de jobalardy iske asyrý kezeńine arnaıy bilimi bar kásibı mamandardy tartýǵa múmkindik beretin kelisimsharttyq qyzmetshiler ınstıtýty zańnamalyq turǵydan engizildi.

Bıyl Prezıdenttik jastar kadr rezervine úshinshi irikteý ótkiziledi. Agenttik basshysy 2023 jyly respýblıkanyń barlyq aımaqtarynda Óńirlik jastar kadr rezervteri qurylatynyn aıtty:

«Bul elimizdiń jastaryna zor qoldaý bolmaq. Sapaly kadrdy bizge eshkim ákelip bermeıdi, olar qoǵamnyń ishinde. Bizdiń mindet – osyndaı jastardy taýyp, memlekettik apparatqa tartý jáne iriktep alý arqyly kásibı memlekettik qyzmetkerlerdiń jańa legin qalyptastyrý», - dedi Agenttik tóraǵasy.

Qazirgi tańda memlekettik qyzmetke irikteý jáne qabyldaý tártibin tolyq tsıfrlandyrý arqyly konkýrstyń ashyqtyǵy men obektıvtiligin qamtamasyz etý qolǵa alyndy. Konkýrstyq rásimniń jańa formaty úmitkerlerge onlaın rejımde, kez kelgen ýaqytta jáne álemniń kez kelgen núktesinen konkýrsqa qatysýǵa múmkindik beredi.

Aımaqta jastardy memlekettik qyzmetke daıyndaý maqsatynda olarǵa qyzmettiń erekshelikterin túsindirý jáne yntalandyrý jumystaryn júrgizetin «Jas memlekettik qyzmetshiler mektebi» qyzmet etedi.

«Keleshek bilimdi, jahandyq deńgeıde oılaı alatyn jastardyń qolynda. Ortalaryńyzda bolashaqta memlekettik qyzmetke kelemin degen jastarǵa aıtarym, basty maqsat – úlken bastyq bolý emes, el ıgiligi úshin qyzmet etý bolýy kerek. Maqsat jeke mansaptyq ambıtsııalarǵa emes, eń aldymen qoǵamdyq múddelerge negizdelýi kerek», - dedi Darhan Jazyqbaev.