Jeke adamǵa avtolızıng baǵdarlamasy nege bastalmaı jatyp toqtap qaldy

ASTANA. KAZINFORM – Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andakov Úkimet otyrysynan keıin ótken baspasóz máslıhatynda jeke tulǵalarǵa arnalǵan avtolızıng aıasynda shetelden ákelingen kólikterdi de alýǵa bolatynyn aıtty.

– Avtolızıng týraly aıtsaq, ForteLeasing aıasynda birinshi legi berildi. Bul 3 jylǵa 15 paıyzdyq mólsherleme bolatyn. Biraq byltyr qarasha aıynda jeke tulǵalarǵa avtolızıng beretin ózgeristerdi zańǵa engizdik. Qazir ınvestor, mashına jasaýshylar qaýymy jáne mınıstrlik bolyp úshjaqty kelisim aıasynda lızıng reglamentterin ázirlep jatyrmyz. Óıtkeni birishi lektegi lızıngten keıin másele týyndap jatyr. Ulttyq ekonomıka mınıstrliginiń usynystary da bar. Іshki ister mınıstrliginiń de suraqtary bar. Nege deseńiz, kólik lızıng bergen kompanııanyń atynda qalady. Al kólik minip júrgen lızıng alýshy jol erejesin buzsa, aıyppul kólik ıesine jazylady. Birinshi ret iske qosylyp jatqandyqtan, osy sııaqty kóptegen suraq týyndap otyr. Osy máseleniń bári tolyq sheshilgennen keıin lızıng sharttaryn qosymsha habarlaımyz, - dedi komıtet ókili.

Sondaı-aq ol lızıng boıynsha alynatyn kólikterdiń markasyna shekteý bolmaıtynyn aıtty.

– Qazaqstanda jasalǵan kólikterge de, shetelden ákelingen kólikke de lızıng beriledi. Al 4 paıyzdyq avtonesıeniń revolverlik aınalymynda 80 mlrd teńge júr. Ekinshi bólingen 100 mlrd teńge qoǵmadyq kólik parkin jańalaý úshin avtobýstarǵa berilip jatyr, - dedi Muhamed Andakov.

Buǵan deıin Ónerkásip jáne qurylys mınıstrligi Ónerkásip komıtetiniń tóraǵasy Azamat Panbaev Úkimet otyrysynan keıin ótken baspasóz máslıhatynda avtolızıng qazaqstandyqtarǵa nesimen tıimdi bolatynyn aıtqan edi.