Jeke adamdardyń qolynda ketken 500-den astam jádiger mýzeıge qaıtarylǵan
ASTANA. KAZINFORM — Sot sheshimimen tárkilengen jeke adamdarǵa tıesili 500-den astam jádiger mýzeı qoryna ótkizildi. Bul jaıynda Mádenıet jáne aqparat mınıstrliginen málim etti.
«Jalpy shetel asqan mádenı qundylyqtardy elge qaıtarý — mádenıet salasynyń basym baǵyttarynyń biri. Elimizdiń qazaq halqyna tıesili mádenı qundylyqtardy tarıhı otanyna qaıtarý máselesinde ózindik tájirıbesi bar. Sońǵy jyldary elimizge birqatar tarıhı qundy zattar qaıtaryldy. Atap aıtqanda, Reseı Ǵylym akademııasynyń I Petr atyndaǵy Antropologııa jáne etnografııa mýzeıinen (Kýnstkamera) Keıki batyrdyń bas súıegi tarıhı otany Qostanaı oblysyna jetkizildi. Sondaı-aq, Qazaqstan Respýblıkasy Prezıdenttik mádenı ortalyǵynyń qorynan túrli jyldary zertteý jáne ǵylymı jumystaryn júrgizý úshin AQSh-tyń Pensılvanııa shtatyndaǵy Karnegı jaratylys tarıhı mýzeıine (Pıtsbýrg qalasy, Oklend qalashyǵy) ýaqytsha paıdalanýǵa berilgen 528 dana jádiger (úı janýarlary súıekteriniń fragmentteri) 2020 jyly elordamyzdaǵy Ulttyq mýzeı qoryna qaıtaryldy», — dep atap ótedi mınıstrlikten agenttiktiń resmı saýalyna oraı.
Vedomstvo málimetinshe, sońǵy 3 jyl ishinde mınıstrlikke qarasty respýblıkalyq mýzeıler men quqyq qorǵaý organdary birlesip, sot sheshimimen tárkilengen jeke adamdarǵa tıesili 500-den astam mýzeılik mańyzy bar zattardy mýzeı qoryna qabyldady.
«Atap aıtqanda, Ortalyq memlekettik mýzeı qory túrli tarıhı kezeńderdiń tarıh, mádenıet jáne óner salasynan habar beretin 360 qundylyqpen, Ulttyq mýzeıdiń qory 176 dana eksponatpen (mamonttardyń múıizi) tolyqty. Osyǵan oraı, atalǵan máseleniń mańyzdylyǵyn eskere otyryp, mýzeı janynan qazaq halqynyń tarıhy men mádenıetine qatysy bar qundylyqtardy izdestirý, anyqtaý jáne qaıtarý máseleleri boıynsha jumys toby turaqty jumys jasap keledi. Onyń quramyna tarıh ǵylymdarynyń doktory, professor J.Taımaǵambetov, tarıh ǵylymdarynyń doktory, professor Z.Samashev, tarıh ǵylymdarynyń kandıdaty, qarý-jaraq isi boıynsha zertteýshi Q.Ahmetjan syndy ǵalymdar men shyǵarmashylyq ıntellıgentsııa ókilderi kiredi», — dedi mınıstrlikten.
