Jeenbekov pen Rahmon shekara mańy aýdandarynyń turǵyndarymen kezdesti

BІShKEK. Kabar-QazAqparat – Búgin, 26 shilde kúni, Qyrǵyzstan men Tájikstan prezıdentteri Sooronbaı Jeenbekov pen Emomalı Rahmon birlesip, Batken aýdanynyń Aqsaı aýyly men Isfara qalasy Vorýh aýyldyq keńesiniń Todjıkon eldi mekeni tusyndaǵy qıylysqan ýchaskesinde shekara mańynda ornalasqan aýdandardyń turǵyndarymen kezdesý ótkizdi, dep habarlaıdy QazAqparat HAA Kabar agenttigine silteme jasap.

Qyrǵyz Respýblıkasy prezıdentiniń aqparat saıasaty bóliminiń málimetinshe, eki eldiń basshylary resmı delegatsııa múshelerin tanystyryp ótken.

Jergilikti turǵyndarmen kezdesý barysynda qos eldiń prezıdentteri eki halyq arasyndaǵy birlik pen kelisimdi, ǵasyrlar boıǵy dostyq qarym-qatynasty saqtap qalǵan jón bolatynyn jáne taraptardyń shekarada oryn alǵan barlyq qıyndyqtardy joıý úshin qajetti sharalardy qabyldaýǵa daıyn ekenin atap ótti.

Jeenbekov Qyrǵyzstan eli Tájikstanmen baýyrlastyq qarym-qatynasty qadirleıtinine erekshe toqtaldy.

«Biz shekarada ornalasqan aýdandarda turatyn halyqtarymyzdyń jaǵdaıyn jaqsy bilemiz. Barlyq sheshilmegen máselelerden habardarmyz jáne jergilikti turǵyndardyń qıyndyq kórmeýi úshin qolymyzdan kelgenin jasaýǵa ázirmiz. Shekaramyzdy birlik, dostyq pen kórshilik qaqpasy etkimiz keledi. Sheshilmeıtin másele joq dep oılaımyn», - dedi Jeenbekov.

Eki eldiń basshylarynyń kelissózderi erteń, 27 shildede, Sholpan Ata qalasynda jalǵasady.